नीलकण्ठले सुरु गर्‍यो फोहोरबाट कम्पोस्ट मल उत्पादन,परिक्षणपछि विक्रि गरिने

धादिङ । नीलकण्ठ नगरपालिकाले कम्पोस्ट मल बनाउन सुरु गरेको छ ।

नगरपालिकाको वडा नं ८ स्थित ससाह ज्यामिरेमा मल उत्पादन केन्द्र स्थापना गरि कुहिने फोहोरबाट कम्पोस्ट मल बनाउन सुरु गरेको हो ।

युएसएआइडी तयार नेपालको सहयोग र ब्लु वेष्ट टु भ्यालु कम्पनीको सहजीकरणमा सदरमुकाम धादिङबेशीको फोहोर व्यवस्थापन गरी कम्पोस्ट मल उत्पादन सुरु गरेको हो ।

बुधबार एक कार्यक्रमकाविच मल उत्पादन केन्द्र नगरपालिकालाई हस्तान्तरण गरिएको छ।

बजार क्षेत्रबाट निस्कने कुहिने फोहोरबाट मल उत्पादन गरी निश्चित मापदण्ड बनाएर विक्रि वितरण गरेर आम्दानीको श्रोत बढाउने लक्ष्य रहेको नगरपालिकाका उप–प्रमुख दिपक विश्वकर्माले बताउनुभयो ।

बजारको फोहोर व्यवस्थापनमा वर्षौदेखि देखिएको समस्या समाधान बताउनुभयो ।

स्वच्छ, सफा र हराभरासहित फोहोरलाई मोहर बनाउने अभियान स्वरुप मल उत्पादन सुरु गरिएको नगरपालिकाका प्रमुख प्रशासकिय अधिकृत पुरुषोत्तम सुवेदीले जानकारी दिनुभयो ।

यो अभियानले ल्याण्डफिल्ड साइड क्षेत्रका प्रभावित र स्थानीय सरकार दुवै पक्षलाई फाइदा पुग्ने उहाँको भनाई छ ।

नगरपालिकाका प्रवक्ता एवम् वडा नम्बर ८ का वडा अध्यक्ष प्रकाश कुमार श्रेष्ठले उत्पादन गरिएको कम्पोष्ट मल परिक्षणका लागि ल्याव पठाइएको बताउनुभयो ।

परिक्षणपछि निर्धारण भएको बजार दररेटमा ५० प्रतिशत छुटमा नगरपालिकाबासीलाई मल विक्रि गरिने बताउनुभयो ।

कुहिने फोहोरलाई कम्पोष्ट मल बनाएर व्यवस्थापन गर्ने कार्यको थालनी गरिएपनि नकुहिने र सिसाजन्य फोहोर व्यवस्थपनको लागि चुनौति रहेको बताउनुभयो ।

नगरपालिका भित्रका फोहोर व्यवस्थापन वर्षाेदेखि चुनौति बनिरहेको भन्दै वडाध्यक्ष श्रेष्ठले अहिले फोहोर डम्पिङ गरिरहेको ठाउँको व्यवस्थापन गरि ल्याण्डफिल्ड साइडमा व्यवस्थित गर्ने उद्देश्यसहित अघि बढेको उहाँको भनाई छ ।

यस्तै नगरपालिकाले नगर भित्रका टोल सुधार समिति मार्फत २२ जनालाई नकुहिने फोहोरबाट हस्तकला सामाग्री बनाउने तालिम र कुहिने नकुहिने फोहोर छुट्याएर कुहिने फोहोरलाई कसरी मल बनाउने भन्ने तालिम र प्रविधि समेत प्रदान गरेको छ।