कराते खेलाडी एरिका र प्रशिक्षक कुशललाई सम्मान

काठमाडौँ । रेडियन्ट रिडर्स एकेडेमीले करातेका एरिका गुरुङ र कुशल श्रेष्ठलाई सम्मान गरेको छ।

मंगलबार लगनखेलस्थित सैनिक शारीरिक तालिम तथा खेलकुद केन्द्रमा भएको रेडियन्ट रिडर्सको वार्षिक खेलकुद दिवसका अवसरमा ललितपुर महानगरपालिकाका प्रमुख चिरीबाबु महर्जन र रेडियन्ट रिडर्सका संस्थापक प्रिन्सिपल डिके ढुङ्गानाले खेलाडी एरिका र प्रशिक्षक कुशललाई दोसल्ला र प्रशंसापत्रसहित सम्मान गर्नुभएको हो।

आफ्नो खेल करियरमा विश्व च्याम्पियनसिपसहित समग्रमा ६ अन्तराष्ट्रिय प्रतियोगिता खेलेकी एरिकाले विश्व च्याम्पियनसिपबाहेक ५ अन्तरराष्ट्रिय प्रतियोगितामा ४ स्वर्ण, ३ रजत र एक कांस्य गरी ८ पदक जित्नुभएको छ ।

सबै प्रतियोगितामा पदक जित्दा कुशल नै एरिकाको प्रशिक्षक हुनुहुन्थ्यो । कुशल १०औँ दक्षिण एसियाली खेलकुद (साग) का स्वर्ण विजेता पनि हुनुहुन्छ ।

धादिङको नीलकण्ठ नगरपालिका–१३ लाहुरे गाउँकी एरिकाले केही समय अघि मात्रे सम्पन्न भएको एसियन च्याम्पियनसिपमा रजत पदक जित्न सफल हुनुभएको थियो ।

जुन नेपालको पहिलो पदक हो ।अहिलेसम्म कुनै पनि नेपाली खेलाडीले एसियन सिनियर च्याम्पियनसिपमा पदक जित्न सकेका थिएनन् ।