धादिङ अस्पतालको अध्यक्ष सापकोटाद्धारा पदभार ग्रहण : गरे ३ निर्णयमा हस्ताक्षर (निर्णय,तस्विर र भिडियोसहित)

धादिङ । सदरमुकाम धादिङबेशीमा रहेको धादिङ अस्पताल, धादिङको सञ्चालन तथा व्यवस्थापन समितिका अध्यक्ष राधिका सापकोटाले पदभार ग्रहण गर्नुभएको छ ।

बिहिबार एक कार्यक्रमका बीच अध्यक्ष सापकोटाले पदभार ग्रहण गर्नुभएको हो ।पदभार ग्रहण गर्नुहुँदै अध्यक्ष सापकोटाले ३ वटा निर्णयमा हस्ताक्षर गर्नुभएको छ ।

अध्यक्ष सापकोटाले अस्पतालको भवन निर्माणको म्एच् संशोधन गरी बागमती प्रदेश स्वास्थ्य मन्त्रालयबाट स्वीकृत गराई भवन निर्माण कार्य अगाडी बढाउने, डायलाईसिस सेवालाई थप विस्तार गरी डायलाईसिस सेवा लिन प्रतिक्षारत बिरामीहरुलाई सेवा प्रवाहको व्यवस्था मिलाउने र अस्पतालमा खानेपानीको समस्यालाई समाधान गर्न बागमती प्रदेश सरकारसँग पहल गरी खानेपानीको व्यवस्थापन (डिप बोरिङ) गर्ने निर्णयमा हस्ताक्षर गर्नुभएको हो ।

निर्णयहरु तस्विरमा 

पदभार ग्रहण पछी औपचारिक कार्यक्रमलाई सम्बोधन गर्नुहुदै अध्यक्ष सापकोटाले विगतमा भएका सुधारका कामलाई निरन्तरता दिने र थप सेवालाई विस्तार गर्ने बताउनुभयो।

उहाँले अस्पतालको मुहार फेर्न सामुहिक प्रयास बाट मात्रै सकिने भन्दै बिकास निर्माण र सेवा सुविधाको विस्तारमा हातेमालो गर्न आग्रह गर्नुभयो। उहाँले अस्पतालमा सुझाव संकलन कार्यलाई ब्यवस्थित गरि सवैको सल्लाह सुझाव अनुसार काम गर्ने बताउनुभएको छ ।

यस्तै कार्यक्रममा नीवर्तमान अध्यक्ष राजाराम रिजालले आफ्नो कार्यकाल सफल बनाउन सहयोग पु¥याउने सवैलाई धन्यावाद व्यक्त गर्दै नवनियुक्त अध्यक्ष सापकोटालाई बधाई दिनुभयो । उहाँले आगामी दिनमा पनि धादिङ अस्पतालको विकासमा आफ्नो तर्फबाट सक्दो सहयोग र पहल गर्ने प्रतिबद्धता व्यक्त गर्नुभएको छ ।

कार्यक्रममा अस्पतालका निमित्त मेडिकल सुपरिटेन्डेन्ट डा.गगन अधिकारीले बागमती प्रदेश अन्तर्गतको धादिङ अस्पतालमा विशेषज्ञ सेवा विस्तार हुँदै गएसँगै बिरामीको संख्या पनि वृद्धि भएको बताउनुभयो ।

अस्पतालमा अहिले बिशेषज्ञ चिकित्सक,मेडिकल अधिकृत,चिकित्सक र अन्य सेवाका गरी एक सय भन्दा बढि कर्मचारी कार्यरत रहेका बताउनुभयो ।

सय शय्यामा सञ्चालनमा रहेको यसु अस्पतालले हाल आइसीयु, हेमोडायलाइसिस, आकस्मिक, ओपिडी,प्रसूति, शल्यक्रिया, फिजियोथेरापी, प्रयोगशाला, फार्मेसी, एक्सरे, भिडियो एक्सरे, एआटी, ओसिएमसी, एसएनसियु सेवा बालरोग, हाडजोर्नी, स्त्री तथा प्रसुति रोग, जनरल सर्जरी, इन्टरनल मेडिसिन र एमडीजीपी सहितको विशेषज्ञ ओपिडी सेवा प्रवाह गरिरहेको अस्पतालका निमित्त मेडिकल सुपरिटेन्डेन्ट डा.अधिकारीले बताउनुभयो ।

सापकोटालाई बागमती प्रदेश स्वास्थ्य मन्त्रालयको मन्त्रीस्तरको निर्णयबाट यहि पुष ७ गते धादिङमा रहेको एकमात्र प्रादेशिक अस्पताल धादिङ अस्पतालको सञ्चालन तथा व्यवस्थापन समितिको अध्यक्षमा मनोनित गरिएको थियो ।

धादिङ अस्पतालको ईतिहासमा छैटौं अध्यक्षको रुपमा पहिलो पटक महिला अध्यक्ष नियुक्त हुनुभएको हो ।

मानव अधिकार तथा महिला अधिकारको क्षेत्रमा काम गर्दै आउनुभएको सापकोटा नेकपा एमाले धादिङका सचिव एवम सहयात्री समाज नेपालका कार्यकारी निर्देशक हुनुहुन्छ।

भिडियो…………………