धादिङमा २४ जना निम्न माध्यमिक शिक्षकको नियुक्ति

धादिङ । धादिङमा २४ जना निम्न माध्यमिक तहको शिक्षक नियुक्ति गरिएको छ।

शिक्षा विकास तथा समन्वय इकाइ धादिङले जिल्लामा दरबन्दी रहेर पनि खाली भएका २४ जना निम्न माध्यमिक तहका शिक्षकलाई नियुक्तिपत्र दिएर कार्यक्षेत्रमा पठाएको छ।

इकाइका अनुसार गणितका ११ जना, सामाजिकका ५ जना,विज्ञानका ४ जना, अंग्रेजीका ३ जना र नेपालीका १ जना शिक्षकलाई नियुक्ति दिईएको हो ।

गल्छी गाउँपालिकामा १ जना नेपाली, सिद्धलेक, त्रिपुरासुन्दरी र नेत्रावती डबजोङ गाउँपालिकामा १/१ जना अंग्रेजी, सिद्धलेकमा २ जना विज्ञान र थाक्रे र गजुरीमा एक/एक जना विज्ञान, गल्छी, सिद्धलेक, नीलकण्ठ, गंगाजमुना र रुवीभ्यालीमा एक/एक जना सामाजिक विषयका शिक्षकलाई पठाइएको शिक्षा विकास तथा समन्वय इकाइका प्रमुख भुमिलाल सुवेदीले बताउनुभयो ।

गणित विषयको ठूल संख्यामध्ये नीलकण्ठ, गंगाजमुना, बेनिघाट रोराङमा दुई/दुई जना तथा सिद्धलेक, थाक्रे, खनियाबास, रुवीभ्याली र नेत्रावती डबजोङमा एक/एक जना शिक्षकलाई नियुक्ति दिइएको छ ।

शिक्षकहरुलाई शिक्षा विकास तथा समन्वय इकाइका प्रमुख सुवेदीले सपथग्रहण गराउँदै शिक्षकको शैक्षिक, सामाजिक र व्यक्तिगत भूमिका महत्वपूर्ण हुने बताउनुभयो ।

उहाँले नियुक्त भएका शिक्षकहरुको कामले आगामी शैक्षिक गुणस्तरमा वृद्धि हुने विश्वास व्यक्त गर्नुभयो।

शिक्षक अभाव खेपी रहेका विद्यालयहरुले शिक्षकका नियुक्तिपछि सहज महसुस गरेका छन् ।