महिला टी-२० शृंखला:नेपालले आज नेदरल्याण्ड्ससँग खेल्ने

काठमाडौं । महिला टी-२०आई शृंखला अन्तरगत नेपालले आज नेदरल्याण्ड्ससँग खेल्दै छ ।

काठमाडौंमा जारी नेपाल, नेदरल्याण्ड्स र थाइल्याण्ड सम्मिलित शृंखलाको आफ्नो पाँचौं खेलमा नेपालले आज नेदरल्याण्ड्ससँग खेल्न लागेको हो ।

खेल त्रिवि क्रिकेट मैदान कीर्तिपुरमा दिउँसो सवा १२ बजेदेखि सुरू हुँदैछ।

नेपाल यसअघिका चारवटै खेलमा पराजित भइसकेको छ भने उपाधि होडबाट बाहिरिसकेको छ । नेपाल अब बाँकी दुई खेलहरूमा प्रतिष्ठाको लडाइँमा हुनेछ ।

नेदरल्याण्ड्सका लागि भने यस खेल जित्नैपर्ने दबाब रहनेछ ।

चार खेलमा दुई जित निकालेको नेदरल्याण्ड्स उपाधि होडमा अझै जीवित छ । नेपाल भने ऐतिहासिक जितको खोजीमा हुनेछ ।शृंखलामा थाइल्याण्डले हालसम्म चारवटै खेल जित्दै उपाधि दाबेदारको रूपमा रहेको छ ।

थाइल्याण्डले अब नेपाल र नेदरल्याण्ड्ससँग एक/एक खेल खेल्न बाँकी छ ।नेपालले यसपछि अन्तिम खेलमा शुक्रबार थाइल्याण्डसँग खेल्ने छ ।