धादिङमा एच.पि.भि खोप अभियान : दुई दिनमा ६ हजार ३ सय बढि किशोरीले लगाए खोप

धादिङ। धादिङसहित देशभर पाठेघरको मुखको क्यान्सरविरुद्धको निःशुल्क ‘एचपीभी खोप’ अभियान जारी छ।

पाठेघरको मुखको क्यान्सरका कारण बढ्दै गएको र अकाल मृत्युको जोखिमबाट जोगाउने उद्देश्यका साथ सरकारले यही माघ २२ देखि देशभरि पाठेघरको मुखको क्यान्सरविरुद्धको ह्युमन प्याभिलोमा भाईरस (एच.पि.भि.) खोप अभियान सञ्चालन गरिरहेको छ।

सोही अनुरुप धादिङमा अभियान अन्तरगत हालसम्म ६ हजार भन्दा बढी किशोरीले खोप लगाएका छन्।

जिल्लामा खोप अभियान दुई चरणमा सञ्चालन हुने छ ।

जनस्वास्थ्य कार्यालयका अनुसार पहिलो चरणमा माघ २२ गतेदेखी नीलकण्ठ नगरपालिका, रुवीभ्याली, खनियावास, नेत्रावती डवजोङ, गंगाजमुना, त्रिपुरासुन्दरी, ज्वालामुखी र सिद्धलेक गाउँपालिकामा खोप अभियान सञ्चालन भईरहेको छ ।

अभियानमा हालनीलकण्ठका २ हजार २९२,सिद्धलेकका ८९०,त्रिपुरासुन्दरीका ७७७, ज्वालामुखीका ७२९, गंगाजमुनाका ५४१, खनियाबासका ४५४, रुवी भ्यालीका ३६० र नेत्रावती डवजोङका ३३५ गरी ६ हजार ३७८ जनाले खोप लगाएको जनस्वास्थ्य कार्यालय धादिङले जनाएको छ ।

यी ८ पालिकामा २६ गतेसम्म सञ्चालन हुनेछ।

यस्तै दोस्रो चरणमा फागुन १ गतेदेखी ५ गतेसम्म धुनिवेशी नगरपालिका, थाक्रे, गल्छी, गजुरी, बेनिघाट रोराङ गाउँपालिकामा सञ्चालन हुनेछ ।

यस अभियानबाट धादिङका १४ हजार ५सय ७३ किशोरीलाई खोप लगाईने जनस्वास्थ्य कार्यालय धादिङका खोप सुपरभाइजर श्याम पोखरेलले जानकारी दिनुभयो ।

उहाँका अनुसार कक्षा ६ देखि १० सम्म अध्ययनरत छात्रा तथा विद्यालय बाहिर रहेका १० वर्षदेखि १४ वर्ष उमेर समूहका बालिका र किशोरीलाई खोप लगाउँदैछ ।

जिल्लाका २ सय ४० विद्यालय खोप केन्द्र र ९६ स्वास्थ्य संस्थाका खोप केन्द्र गरी ३३६ खोप केन्द्र मार्फत खोप लगाउँदैछ ।अभियानमा ३३६ जना स्वाथ्यकर्मी र ६७२ स्वयंमसेविका परिचालन हुने छन् ।