नलाङ माविले कक्षा १-१० सम्म अध्ययनरत विद्यार्थीबाट कुनै पनि शुल्क नलिने

धादिङ। सिद्धलेक गाउँपालिका-१ चरिमारेमा रहेको नलाङ माध्यमिक विद्यालयले कक्षा १ देखि १० सम्म अध्ययनरत विद्यार्थीबाट कुनै पनि शुल्क नलिने निर्णय गरेको छ ।

बुधबार बसेको विद्यालय व्यवस्थापन समितिको दोस्रो बैठकले विद्यार्थीबाट अतिरिक्त कक्षा (ट्युसन तथा कोचिङ) बाहेक कुनै पनि शुल्क नलिने निर्णय गरेको हो।

विद्यालय व्यवस्थापन समिति अध्यक्ष पूर्ण प्रसाद सिम्खडाको अध्यक्षतामा बसेको बैठकले परीक्षा सञ्चालन खर्च सिद्धलेक गाउँपालिका र वडा कार्यालयसँग समन्वय गरी व्यवस्थापन गर्ने निर्णय गरेको छ।

त्यसैगरी कक्षा ६ देखि १० सम्म अध्ययनरत विद्यार्थीहरूमा स्वस्थ खाने बानीको विकास गराउने उद्देश्यले आफ्नै घरमा तयार गरिएको स्वास्थ्यकर खाजा विद्यालयमा ल्याउने व्यवस्था मिलाउने तथा प्रत्येक विद्यार्थीलाई खाजा ल्याउन आवश्यक एक-एक वटा टिफिन बट्टा विद्यालयले उपलब्ध गराउने पनि निर्णय गरिएको छ।

सिद्धलेक गाउँपालिका-१ का वडा अध्यक्ष पेमा वाङ्ग्याल लामाले सामुदायिक विद्यालयको शैक्षिक गुणस्तर सुधार र विद्यार्थीको हितलाई केन्द्रमा राखेर निर्णय गरिएको बताउनुभयो।

उहाँले निर्णयहरूको प्रभावकारी कार्यान्वयनका लागि वडा कार्यालयबाट आवश्यक सहयोग रहने प्रतिबद्धता व्यक्त गर्नुभयो।

विद्यालय व्यवस्थापन समिति अध्यक्ष पूर्ण प्रसाद सिम्खडाले आर्थिक अभावका कारण कुनै पनि विद्यार्थी शिक्षाबाट वञ्चित हुन नपरोस् भन्ने उद्देश्यले शुल्क नलिने निर्णय गरिएको बताउनुभयो।

उहाँले विद्यालयलाई अनुशासित, गुणस्तरीय र प्रविधिमैत्री शिक्षाको केन्द्रका रूपमा विकास गर्न सबै पक्षसँग सहकार्य गरेर अघि बढ्ने बताउनुभएको छ।

विद्यालयका प्रधानाध्यापक अर्जुन सिलवालले विद्यालयलाई गुणस्तरीय, विद्यार्थीमैत्री र आर्थिक रूपमा सहज बनाउने उद्देश्यले महत्वपूर्ण निर्णयहरू गरिएको बताउनुभयो।

उहाँले विद्यालय व्यवस्थापन समिति, वडा कार्यालय तथा अभिभावकबीचको सहकार्यले विद्यालयको शैक्षिक वातावरण थप सुदृढ हुने विश्वास व्यक्त गर्नुभयो।

यसअघि असार ११ गते बिहीबार विद्यालयमा आयोजित अभिभावक भेला तथा विद्यालय व्यवस्थापन समिति पुनर्गठन कार्यक्रमबाट पूर्ण प्रसाद सिम्खडा विद्यालय व्यवस्थापन समितिको अध्यक्षमा चयन हुनुभएको थियो।

उक्त कार्यक्रममा धादिङ समाज जापानका अध्यक्ष बिमल श्रेष्ठले विद्यालयको आर्थिक अवस्थाका कारण रिक्त रहेको सूचना तथा सञ्चार प्रविधि (ICT) शिक्षकको व्यवस्था एक वर्षका लागि आफ्नै व्यक्तिगत खर्चमा गरिदिने प्रतिबद्धता व्यक्त गरेका थिए।