फुर्केखोलामा पन्टुन पुल राख्न १३ स्थानीय तह एकजुट, खर्च साझा रूपमा व्यहोर्ने

धादिङ। फुर्केखोलाको पक्की पुल बगाएपछि अवरुद्ध सडक सम्पर्क सहज बनाउन धादिङका १३ वटै स्थानीय तहले संयुक्त रूपमा पन्टुन पुल निर्माण गर्ने निर्णय गरेका छन्।

आईतबार जिल्लाका १३ वटै स्थानीय तहका प्रमुख तथा उपप्रमुखहरूको बैठकले पृथ्वी राजमार्गअन्तर्गत फुर्केखोलामा अस्थायी पन्टुन पुल जडान गर्ने र त्यसका लागि आवश्यक खर्च व्यवस्थापन गर्न अन्तरपालिका कार्यविधि बनाउने निर्णय गरेको हो।

बैठकले सबै स्थानीय तहको सहमतिमा कार्यविधि तयार गरी पुल निर्माण तथा सञ्चालनका लागि आवश्यक आर्थिक व्यवस्थापन गर्ने निर्णय गरेको छ।

बैठकले बर्दियाको राजापुर सिँचाइ व्यवस्थापन कार्यालयको मातहतमा रहेको पन्टुन ब्रिज स्थानीय तहको मातहतमा ल्याएर सञ्चालन गर्न सिँचाइ विभागसँग तत्काल समन्वय गर्ने निर्णयसमेत भएको छ।

पन्टुन ब्रिज राजापुरबाट धादिङ ल्याउने प्रक्रियाका लागि सबै स्थानीय तहको प्रतिनिधित्व गर्दै ज्वालामुखी गाउँपालिकाका अध्यक्ष यमनाथ दनैलाई जिम्मेवारी दिइएको छ। त्यसका लागि सम्बन्धित सरकारी निकायसँग आवश्यक समन्वय गर्ने बैठकले निर्णय गरेको छ।

बैठकले फुर्केखोलाको समस्या अस्थायी रूपमा समाधान गर्न पन्टुन पुल जडान गर्ने निर्णय गरे पनि दीर्घकालीन समाधानका लागि भने सोही स्थानमा पक्की मोटरेबल पुल निर्माण गर्न संघ र प्रदेश सरकारसँग आवश्यक समन्वय गर्ने निष्कर्ष निकालेको छ।

त्यस्तै, राजापुर सिँचाइ व्यवस्थापन कार्यालयबाट पन्टुन पुल स्थानीय तहलाई हस्तान्तरण भएपछि एप्रोच सडक निर्माण तथा अन्य आवश्यक व्यवस्थापनका लागि सम्बन्धित सरकारी निकायसँग समन्वय गरिने भएको छ।

बैठकले जिल्लास्थित तीनै तहका जनप्रतिनिधि, राजनीतिक दल, कर्मचारी, नागरिक समाज तथा सरोकारवालालाई आवश्यक समन्वय, सहजीकरण र सहयोगका लागि आग्रह गर्ने निर्णयसमेत गरेको छ।

पुल जडानको सम्भावना र प्राविधिक पक्षबारे सम्बन्धित निकायसँग समन्वय भइरहेको ज्वालामुखी गाउँपालिकाका अध्यक्ष यमनाथ दनैले बताउनुभयो ।

गत भदौ १० गते भोटेकोशीमा आएको बाढीले फुर्केखोलाको पक्की पुल बगाएपछि धादिङबेसी सदरमुकामसहित उत्तरी धादिङका नागरिकले पृथ्वी राजमार्गसँगको सहज सडक सम्पर्क गुमाएका छन्।

पुल बगेसँगै स्थानीयवासी तथा मालवाहक सवारीसाधनले वैकल्पिक र लामो दूरीको सडक प्रयोग गर्नुपर्ने बाध्यता छ। यसले दैनिक आवतजावतदेखि खाद्यान्न तथा निर्माण सामग्री ढुवानीसम्म प्रभावित हुँदै आएको छ।

के हो पन्टुन पुल ?

पन्टुन पुल पानीमा तैरिने आधारमा निर्माण गरिने अस्थायी पुल हो। नदीमा पिलर गाडेर बनाइने परम्परागत पुलभन्दा फरक यसमा पानीमा तैरिन सक्ने विशेष फलामे संरचना अर्थात् पन्टुन प्रयोग गरिन्छ।

नदीमा पन्टुनहरू लहरै राखेर तिमाथि फलामे संरचना तथा आवतजावत गर्ने सतह तयार गरिन्छ। त्यसपछि आवश्यक प्राविधिक व्यवस्थापन गरी नदीका दुवै किनारमा जोडेर सञ्चालनमा ल्याइन्छ। यसलाई आवश्यकताअनुसार एक ठाउँबाट अर्को ठाउँमा सार्न पनि सकिन्छ।

स्थायी पुल निर्माणमा लामो समय लाग्ने अवस्थामा पन्टुन पुललाई अस्थायी विकल्पका रूपमा प्रयोग गर्न सकिन्छ। तर नदीमा पानीको बहाव अत्यधिक बढ्दा वा बाढी आउँदा यस्तो पुलमा जोखिम हुन सक्छ। त्यसैले यसको सञ्चालनका लागि पानीको बहाव, भारवहन क्षमता र प्राविधिक सुरक्षालाई ध्यान दिन आवश्यक हुन्छ।