धादिङको ७ हजार ७१५ हेक्टरमा रोपाई,अझै ३२ प्रतिशत बाँकी (कुन पालिकामा कति रोपाई ?)

धादिङ । धादिङमा ६८ प्रतिशत धान रोपाई सकिएको छ ।

साउनको दोश्रो साता सुरु हुँदा जिल्लामा यो वर्ष धान खेती हुने अनुमान गरिएको ११ हजार तीन सय १२ हेक्टर मध्ये ७ हजार सात सय १५ हेक्टरमा मात्रै रोपाइ सकिएको कृषि विकास कार्यालय धादिङका प्रमुख निर्मला गुरुङले जानकारी दिनुभयो ।

धान बालीको पकेट क्षेत्र मानिएको फाँटहरुमा अघिल्लो बाली पाकि नसकेका कारण रोपाई हुन सकेको छैन् । कृषि विकास कार्यालयका प्रमुख गुरुङका अनुसार जिल्लामा अझै ३२ प्रतिशत खेतमा रोपाई हुन बाँकी छ ।

नीलकण्ठ नगरपालिकामा धान खेती हुने १ हजार ७५५ हेक्टर मध्ये १ हजार ३१५.८८ हेक्टर (७५ प्रतिशत), धुनिवेशी नगरपालिकामा धान खेती हुने ७३८ हेक्टर मध्ये ६५६.८२ (८९ प्रतिशत) रोपाई भएको छ ।

गजुरीमा धान खेती हुने ९७० हेक्टर मध्ये ४०७.४० (४२ प्रतिशत), गल्छीमा धान खेती हुने ६६० हेक्टर मध्ये ५९४ (९०प्रतिशत), गंगाजमुनामा धान खेती हुने १ हजार १७५ हेक्टर मध्ये १ हजार १३९.७५ (९७ प्रतिशत) र ज्वालामुखीमा धान खेती हुने ९६२ हेक्टर मध्ये ३३६.७० (३५ प्रतिशत) रोपाई भएको छ ।

यसैगरी सिद्धलेकमा धान खेती हुने ७१४ हेक्टर मध्ये ३२१.३० (४५ प्रतिशत), नेत्रावती डवजोङमा धान खेती हुने ६६८ हेक्टर मध्ये ६०१.२० (९० प्रतिशत), थाक्रेमा धान खेती हुने ८९० हेक्टर मध्ये ६२३ (७० प्रतिशत) र रुवीभ्यालीमा धान खेती हुने १५ हेक्टरमा शतप्रतिशत रोपाइ भएको छ ।

यस्तै बेनिघाट रोराङमा धान खेती हुने १ हजार २५ हेक्टर मध्ये ५६३.७५ (५५ प्रतिशत), त्रिपुरासुन्दरीमा धान खेती हुने १ हजार ६५ हेक्टर मध्ये ५३२.५० (५० प्रतिशत) र खनियाबासमा धान खेती हुने ६७६ हेक्टर मध्ये ६०७.९५ (९० प्रतिशत) रोपाइ भएको पछिल्लो तथ्याकंमा उल्लेख छ ।

आकाशेपानीको भरमा रोप्नुपर्ने खेतहरुमा रोपाई चलिरहेको र चैते धान ढिला पाकेको र लगाइएको मकै नपाकेका कारण ढिला रोपाई भएको गुरुङले बताउनुभयो । साउनको तेश्रो सातासम्म रोपाइँ चलिरहने उहाँको भनाई छ ।

जिल्लामा वार्षिक ५० हजार मेट्रिक टन वर्षे धान उत्पादन हुँदै आएको छ ।

नीलकण्ठ नगरपालिका, गंगाजमुना, त्रिपुरासुन्दरी र बेनिघाट गाउँपालिकालाई बर्षे धान खेतीको पकेट क्षेत्र मानिन्छ ।

पछिल्लो समय धादिङका किसानहरु स्थानीय जातको धान रोप्न छाडेर अधिकांश किसानले हाइब्रिड धानप्रति आकर्षित हुने गरेका छन् ।

यो वर्ष कम उचाई भएका ठाउँहरुमा युएस ३१२, धानिया, राजा लगाएका छन् भने अलि बढी उचाई भएका ठाउँहरुमा सावित्री, मनसुली, मकवानपुरे लगायत जातका धान लगाउने गरेका छन् ।

रैथाने जातका धान लगाउने किसानको संख्या निकै कम रहेको बाली संरक्षण अधिकृत जयराम अधिकारीले जानकारी दिनुभयो।

कृषि विकास कार्यालयको तथ्यांकमा ६८ प्रतिशत खेतमा रोपाई भएको भनेपनि स्थानीय पालिकाहरुले भने यकिन तथ्यांक नै दिन सकेको छैन ।

खहरे खोला लाग्ने खेतहरु र पखेरा खेतहरुमा रोपाइ हुन नसकेको कृषि प्राविधिकहरुले जानकारी दिएका छन् ।

स्थानीय तहका प्राविधिकहरुले मोटामोटी अनुमानको भरमा रिपोटिङ गर्ने गरेका छन् ।

कति जमिनमा धान खेती हुन्छ, कति उत्पादन हुन्छ भन्ने कुराको तथ्यांक गाउँपालिकाहरुमा भेटिदैन । आँखाले हेरेर अनुमान लगाएकै आधारमा प्रतिशत निकाल्ने गरिएको छ ।

नेपालमा धान खेती हुने जमिन वार्षिक रूपमा घट्दै गइरहेको बेला धादिङमा पनि त्यसको असर देखिएको छ ।

तथ्यांकअनुसार केही वर्ष अघिसम्म १६ हजार हेक्टर क्षेत्रफलमा धान खेती हुने धादिङ जिल्लामा अहिले घटेर ११ हजार हेक्टरमा मात्रै धान रोपाइ हुने गरेको छ ।

बर्सेनी उर्वर भूमि घरघडेरीका लागि उपभोग हुँदै जानु, कृषिमा जनशक्तिको अभाव, जग्गा बाँझै राख्नु आदि कारणले खेतीयोग्य जमिनको क्षेत्रफल घट्दै गइरहेको विज्ञहरु बताउँछन् ।

हेर्नुहोस् पालिकागत विवरण

तस्विर:असार १५ अर्थात राष्ट्रिय धान दिवसमा त्रिपुरासुन्दरी गाउँपालिका वडा नं ६ स्थित माईथान सिमलेमा मनाईएको राट्रिय धान दिबस तथा रोपाई महोत्सब