धादिङकी सरिता तामाङको हत्यामा संलग्न एकजना पक्राउ

काठमाडौं । धादिङको गजुरी गाउँपालिका-४ घर भएकी १७ वर्षीया सरिता तामाङको हत्या गरेको अभियोगमा एक जना पक्राउ परेका छन् ।

काठमाडौंको चन्द्रागिरी नगरपालिका-१० सतुङगल खरिबोट डेरा गरी बस्ने तामाङको हत्या गरेको अभियोगमा गजुरी गाउँपालिका-३ घर भई काठमाडौं महानगरपालिका-१४ खड्का गाउँ बस्ने २४ वर्षीय विश्वास तामाङलाई बुधबार राति पक्राउ गरिएको प्रहरीले जनाएको छ।

सरिता आफ्नै कोठामा बुधबार दिउँसो मृत अवस्थामा फेला परेपछी उनको दाजुले प्रहरीमा निवेदन दिएका थिए ।

घटनाको अनुसन्धानको क्रममा जिल्ला प्रहरी परिसर काठमाडौंबाट खटिएको प्रहरीले आरोपीलाई काठमाडौँ-१४ स्थित खड्का गाउँबाट पक्राउ गरेको हो ।

आरोपीको साथबाट मृतकको मोबाइल बरामद गरिएको र आवश्यक अनुसन्धान गरिरहेको प्रहरीले जनाएको छ।सरिता तामाङ नैकापस्थित विष्णुदेवी शिक्षा सदनमा १० कक्षामा अध्ययनरत थिइन् ।