पूर्व प्रहरी संगठन धादिङका २२ जनालाई बाजा बजाउने तालिम,नगरपालिकाद्वारा बाजा सहयोग

धादिङ । नेपाल पूर्व प्रहरी संगठन धादिङका २२ जनाले नौमती बाजा बजाउने आधारभूत तालिम लिएका छन् ।

संगठनमा आवद्ध ८ जना महिला र १४ जना पुरुष गरी २२ जनाले बाजा बजाउने १ महिने आधारभूत तालिम लिएका हुन् ।

गत पुस १८ गते देखि माघ १८ गते ३० दिनसम्म तालिम लिई प्रशिक्षित भएको नेपाल पूर्व प्रहरी संगठन धादिङका अध्यक्ष नवराज दुवाडीले जानकारी दिनुभयो ।

बुधबार तालिम समापन समारोह आयोजना गर्दै संगठनले तालिममा सहभागीहरुलाई प्रमाणपत्र वितरण गरेको छ ।

प्रशिक्षितहरुलाई नीलकण्ठ नगरपालिकाका नगर प्रमुख एवम नेपाल नगरपालिका संघका अध्यक्ष भिम प्रसाद ढुंगानाले प्रमाणपत्र वितरण गर्नुभएको हो ।

कार्यक्रमलाई सम्बोधन गर्दै नगर प्रमुख ढुंगानाले प्रहरी संगठनले माग गरेपछि नीलकण्ठ नगरपालिकाले १ लाख ३२ हजार रुपैयाँ बराबरको पञ्चेबाजा सहयोग गरिएको बताउनुभयो ।

पछिल्लो समय बाजा बजाउने पेसा विस्थापित हुँदै गएको अवस्थामा बाजाको संरक्षण गर्न, पूर्वप्रहरीको जीवनस्तरसँगै आर्थिक स्तर उकास्न मद्दत् पुग्ने उहाँले बताउनुभयो ।

अहिले परम्परागत लोकबाजा बजाउने क्रम घट्दै गएको भन्दै यसको संरक्षण गर्नुपर्ने आवश्यकता रहेकाले बाजा बजाउने पेशामा आवद्धहरुलाई प्रोत्साहन गर्नुपर्ने बताउनुभयो ।बाजा बजाउने टोलीलाई एकनासको पहिरनका लागि पोशाक पनि आवश्यक रहेकाले संगठनलाई नगरपालिकाले तत्काल प्रदान गर्ने उहाँको भनाई थियो ।

नगरपालिकाले दिएको बाजाको सहि सदुपयोग भए अरु पनि थपिदिने बताउनुभयो । पूर्व प्रहरीको ज्ञान, सीप, क्षमता र अनुभवलाई नगरपालिकाले सदुपयोग गर्ने भन्दै ढुंगानाले संगठनमा आवद्धको नाम लिस्ट दिन आग्रह गर्नुभएको छ ।उहाँले सीप अनुसारको काम नभएकोले आफ्नो सीप लाई सदुपयोग गर्न पनि आग्रह गर्नुभयो ।

२ हजार १३५ जना सदस्य आवद्ध पूर्व प्रहरी संगठन धादिङले आन्तरिक श्रोतबाट निलकण्ठ–९ का जुठे परियार र भोटे दमाईलाई प्रशिक्षकका रुपमा लिई अहिले संगठनका २२ जनालाई तालिम प्रदान गरिएको र अब यस्लाई निरन्तरता दिईने संगठनका अध्यक्ष दुवाडीले बताउनुभयो ।

नगरपालिकामा माग गरिएको योजना सफल भएको भन्दै उहाँले धन्यवाद व्यक्त गर्नुभयो । पूर्व प्रहरी,सेनाका संगठनहरुलाई यस्तै सिपमुलक तालिम दिन स्थानीय तहलाई उहाँले आग्रह गर्नुभएको छ ।थोरै रकम भए पनि सहि ठाउँमा प्रयोग गरे उपलब्धि हुने उहाँको भनाई थियो।

यसैगरी उक्त तालिम समापन समारोह कार्यक्रममा समाजसेवी विलमान शाक्यले स्वर्गिय कृष्ण नारायण शाक्यको सम्झनामा बिल मान शाक्य तथा शोभा शाक्य र देशान्तर शाक्यको तर्फवाट कला र सस्कृति प्रवर्धनका लागि सहयोग स्वरुप नगद दश हजार प्रदान गर्नुभएको थियो।