धमलाको घरदैलो तीव्र, एकैदिन नीलकण्ठ र ज्वालामुखीमा मतदाता भेटघाट

धादिङ । प्रतिनिधि सभा सदस्य निर्वाचनको लागि धादिङ क्षेत्र नं २ मा नेपाली काँग्रेसबाट उम्मेद्वार रहेका रमेश धमलाले शनिवार नीलकण्ठ नगरपालिको वडा न.२, १२ तथा ज्वालामुखी गाउँपालिकाको वडा नं ४ मा घरदैलो तथा चुनावी सभा गर्नुभएको छ ।

शनिवार विहानै नीलकण्ठ १२ को दामगाडे स्थित नयाँ बस्तीमा भोट माग्न पुग्नुभएका धमलाले उत्तरी धादिङको विभिन्न ठाउँहरुबाट आएका बासिन्दाहरुको समस्या र गुनासो संकलन गर्नुभएको थियो ।

त्यसक्रममा स्थानीयहरुले धमलासंग विस्थापित भएर नयाँ ठाउँ बस्दाका समस्याहरु सुनाएका थिए ।

आफ्नो थालथलो छाडेर नयाँ ठाउँमा दैनिक जीवनयापन गरिरहेकाहरुको दैनिकी सहज बनाउनको लागि रोजगारी सिर्जना गर्ने खालको योजनाहरु ल्याउने प्रतिवद्धता जनाउनुभयो ।

लगत्तै नीलकण्ठ नगरपालिका वडा नं २ को विभिन्न स्थानहरुमा चुनावी प्रचार गर्दै मतदाता भेटघाट गर्नुभएको हो।

वडा नं २ को १६ घर, जुरेथुम चिसापानी सिम्ले लगायतका गाउँहरुमा मतदाताहरु भेटघाट गर्दै स्थानीयहरुलाई परेका समस्या, अप्ठ्यारा र त्यस ठाउँका आवश्यकताहरु बारे अन्तरक्रिया गर्नुभएको छ ।

मतदाताहरुको गुनासोमाथी सम्बोधन गर्दे नेता धमलाले नेपाली काँग्रेस जनताको जीवनस्तर सहज बनाउन र सुधार गर्नको लागि काम गरिरहेको बताउँदै यो चुनावले काँग्रेसका मात्रै नभई देशले नै नयाँ बाटो तय गर्ने बताउनुभयो ।

त्यसलगत्तै ज्वालामुखी गाउँपालिकाको वडा नं ४ मा घरदैलो गर्न पुगेका धमलाले साँधभन्ज्याङ, बराहबालिका, टारी, नयाँबजार, गैरीपुर्सुक, मिलनचोक, बीरे चौतारा, चिलाउनेपानी दोभानटार लगायतका क्षेत्रमा घरदैलो गर्दै मतदाता भेटघाट गर्नुभएको छ ।

भेटघाटको क्रममा रणनितिक हिसावले ज्वालामुखी गाउँपालिकाकै मुहार परिवर्तन गर्ने पाल्पा-साँधभन्ज्याङ-ढोला-मैदी-मजुवा-सडक लाई उच्च प्राथमिकतामा राखेको बताउनुभयो ।

यो सडकलाई समयमै कालोपत्र गर्न सकेको खण्डमा बुढीगण्डकी आयोजना निर्माण सगै आर्थिक समृद्धिमा टेवा पुर्याउने बताउदै नेता धमलाले उक्त सडकलाई बहुबर्षिय आयोजनामा समेट्ने र योजना आयोगमार्फत नै काम गराउने प्रतिवद्धता जनाउनुभयो ।

त्यस्तै तल्लोक्षेत्रबाट जोडिएको दोभानटार-मण्डली-मिलनचोक सडकलाई धार्मिक पर्यटन संग जोडेर अघि बढाउन सकेको खण्डमा यस क्षेत्रको स्थानीयहरुलाई रोजगारी खोज्न अन्त जानुनर्पे बताउनुभयो ।

नेपालकै अनौठो परम्परा बोकेको मण्डली मन्दिरलाई धार्मिक पर्यटनमा जोडेर आन्तरिक पर्यटन प्रवद्र्धन गर्न आफुले योजना बनाउने बताउनुभयो ।