सिद्धलेक गाउँपालिकाद्धारा ६० करोड ५० लाख बढिको बजेट सार्वजनिक,नीति कार्यक्रम र बजेट सर्वसम्मत पारित

धादिङ । सिद्धलेक गाउँपालिकाले आर्थिक वर्ष २०८३र८४ का लागि ६० करोड ५० लाख ४५ हजार २६० रुपैयाँ बराबरको बजेट सार्वजनिक गरेको छ।

सोमबार सम्पन्न १९औँ गाउँसभामा नीति तथा कार्यक्रमसहित वार्षिक आय–व्यय विवरण प्रस्तुत गरिएको हो।

गाउँपालिका उपाध्यक्ष सविता अर्यालले प्रस्तुत गरेको बजेटअनुसार गाउँपालिकाको मुख्य आम्दानी स्रोत संघीय तथा प्रदेश सरकारबाट प्राप्त हुने विभिन्न अनुदान र राजस्व बाँडफाँड रहेका छन्।

संघीय वित्तीय समानीकरण अनुदानबाट १२ करोड २० लाख रुपैयाँ, संघीय राजस्व बाँडफाँडबाट ८ करोड ५२ लाख १६ हजार रुपैयाँ तथा संघीय सशर्त अनुदानबाट २२ करोड ५५ लाख रुपैयाँ प्राप्त हुने अनुमान गरिएको छ।

यस्तै, प्रदेश सरकारबाट वित्तीय समानीकरण अनुदान १ करोड १९ लाख ६३ हजार रुपैयाँ, सवारी साधन कर बाँडफाँडबाट ३० लाख ३१ हजार २६० रुपैयाँ, समपूरक अनुदान २० लाख रुपैयाँ, विशेष अनुदान ७० लाख रुपैयाँ, प्रदेश सशर्त अनुदान चालुतर्फ ६१ लाख ५४ हजार रुपैयाँ र पुँजीगततर्फ ४० लाख रुपैयाँ प्राप्त हुने प्रक्षेपण गरिएको छ। संघीय सशर्त पुँजीगत अनुदानमार्फत ६ करोड ७८ लाख रुपैयाँ प्राप्त हुने अनुमान छ भने ढुङ्गा, गिट्टी तथा बालुवा बिक्री एवं निकासी करबाट १ करोड ७३ लाख रुपैयाँ आन्तरिक आम्दानी गर्ने लक्ष्य राखिएको छ।

नीति तथा कार्यक्रम प्रस्तुत गर्दै गाउँपालिका अध्यक्ष परशुराम खतिवडा ले शिक्षालाई गुणस्तरीय, प्रविधिमैत्री, सीपमूलक तथा रोजगारमुखी बनाउने लक्ष्य लिइएको बताउनुभयो।

विगतदेखि सञ्चालनमा रहेका तर विभिन्न कारणले अपुरा रहेका योजना तथा कार्यक्रमहरूलाई आगामी आर्थिक वर्षमा सम्पन्न गर्ने, नयाँ योजना तथा कार्यक्रमहरू समयमै कार्यान्वयन गरी निर्धारित समयभित्र सम्पन्न गर्ने तथा गाउँपालिकाको समग्र विकास, सुशासन र सेवा प्रवाहलाई थप प्रभावकारी बनाउने अध्यक्ष खतिवडाले बताउनुभयो ।

विद्यालय शिक्षाको गुणस्तर सुधार, शिक्षक क्षमता विकास, डिजिटल सिकाइ प्रवर्द्धन, स्थानीय पाठ्यक्रम कार्यान्वयन तथा विद्यालयको भौतिक पूर्वाधार, पुस्तकालय, प्रयोगशाला र सूचना प्रविधिको पहुँच विस्तारलाई प्राथमिकतामा राखिएको छ।

स्वास्थ्यतर्फ आधारभूत स्वास्थ्य सेवाको गुणस्तर अभिवृद्धि, मातृ तथा शिशु स्वास्थ्य, पोषण, खोप, किशोर स्वास्थ्य र नसर्ने रोग नियन्त्रणका कार्यक्रमलाई विशेष महत्व दिइएको छ।

स्वास्थ्य संस्थाको पूर्वाधार, उपकरण तथा जनशक्ति व्यवस्थापनलाई थप प्रभावकारी बनाउने नीति लिइएको गाउँपालिकाले जनाएको छ।

कृषि क्षेत्रलाई व्यवसायिक र आधुनिक बनाउने लक्ष्यसहित उत्पादन, उत्पादकत्व र बजारीकरण वृद्धि गर्ने कार्यक्रम बजेटमा समावेश गरिएको छ।

सिँचाइ, कृषि सडक, कृषि यान्त्रीकरण र भण्डारण पूर्वाधारमा लगानी बढाइने तथा युवा र महिलालाई कृषि उद्यमशीलतामा आकर्षित गरी रोजगारी तथा स्वरोजगार सिर्जना गरिने उल्लेख गरिएको छ।

बजेटले महिला सशक्तीकरण, आर्थिक आत्मनिर्भरता, नेतृत्व विकास र उद्यमशीलता प्रवर्द्धनलाई समेत प्राथमिकतामा राखेको छ। लैङ्गिक हिंसा, बालविवाह, घरेलु हिंसा तथा विभेद अन्त्यका लागि विशेष कार्यक्रम सञ्चालन गरिने जनाइएको छ।

गाउँपालिकाले सूचना प्रविधिमा आधारित सेवा प्रवाह, पारदर्शिता र जवाफदेहितालाई सुदृढ बनाउने नीति लिएको छ।

शिक्षा, स्वास्थ्य तथा कृषि उत्पादनसँग प्रत्यक्ष सम्बन्धित सडक, खानेपानी, सिँचाइलगायतका पूर्वाधार निर्माणलाई प्राथमिकता दिइने जनाइएको छ।

सभामा विधायन समितिका संयोजक सुरेन्द्र कुमार मगरले विनियोजन विधेयक, २०८३ पेश गर्नुभएको थियो।

सभाले नीति तथा कार्यक्रम, आर्थिक विधेयक तथा विनियोजन विधेयकमाथि विस्तृत छलफल पश्चात सम्पूर्ण प्रस्तावहरू सर्वसम्मत रूपमा पारित भएको गाउँपालिकाले जनाएको छ ।