रुवी भ्याली गाउँपालिकाको बजेट ४१ करोड २२ लाख: कृषि,पूर्वाधार विकास प्राथमिकतामा

धादिङ। धादिङको रुवी भ्याली गाउँपालिकाको १९औँ गाउँसभा सम्पन्न भएको छ। गाउँसभाले आर्थिक वर्ष २०८३/०८४ का लागि ४१ करोड २२ लाख रुपैयाँ बराबरको बजेट, नीति तथा कार्यक्रम सर्वसम्मत रूपमा पारित गरेको छ।

गाउँपालिकाका उपाध्यक्ष फेलामा तामाङले आगामी आर्थिक वर्षका लागि बजेट प्रस्तुत गर्नुभएको थियो। प्रस्तुत बजेटमा शिक्षा, स्वास्थ्य, कृषि, पूर्वाधार विकास, खानेपानी, पर्यटन प्रवर्द्धन, रोजगारी सिर्जना तथा सामाजिक सुरक्षालाई प्राथमिकतामा राखिएको गाउँपालिकाले जनाएको छ।

गाउँसभालाई सम्बोधन गर्दै गाउँपालिका अध्यक्ष राम सिंह तामाङले स्थानीय आवश्यकतालाई केन्द्रमा राखेर समावेशी, दिगो र जनमुखी विकासका कार्यक्रम कार्यान्वयन गरिने बताउनुभयो।

उहाँले गाउँपालिकाको समग्र विकासका लागि जनप्रतिनिधि, कर्मचारी, राजनीतिक दल तथा स्थानीय नागरिकबीच सहकार्य आवश्यक रहेको उल्लेख गर्नुभयो।

गाउँसभामा प्रस्तुत बजेट, नीति तथा कार्यक्रममाथि सदस्यहरूले छलफल गरेका थिए। छलफलपछि बजेट तथा कार्यक्रम सर्वसम्मत रूपमा पारित गरिएको गाउँपालिकाले जनाएको छ।

गाउँपालिकाले आगामी आर्थिक वर्षमा स्थानीय नागरिकको जीवनस्तर सुधार, आधारभूत सेवा विस्तार तथा दिगो विकासका योजनालाई प्रभावकारी रूपमा कार्यान्वयन गर्ने प्रतिबद्धता व्यक्त गरेको छ।