अन्तर्राष्ट्रिय युवा दिवसको अवसरमा धादिङ युवा घोषणापत्र सार्वजनिक

धादिङ । अन्तर्राष्ट्रिय युवा दिवसको अवसरमा धादिङमा ‘Dhading Youth Cafe 2026’ सम्पन्न भएको छ।

युवाका समसामयिक सवाल, रोजगारी, उद्यमशीलता, नेतृत्व तथा सामाजिक परिवर्तनका विषयमा खुला संवाद र अन्तरक्रिया गरिएको कार्यक्रममा ‘धादिङ युवा घोषणापत्र २०८३’ समेत सार्वजनिक गरिएको छ।

‘खुलेर कुरा गरौँ, मिलेर परिवर्तन गरौँ’ भन्ने नारासहित आयोजित कार्यक्रममा युवाहरूले युवालाई विकासको लक्षित समूह मात्र नभई विकासका साझेदार र नेतृत्वकर्ताका रूपमा स्वीकार गर्न सरकारसँग माग गरेका छन्।

घोषणापत्रमा बेरोजगारी, सीप तथा रोजगारीका अवसरको कमी, उद्यमशीलताका लागि वित्तीय पहुँचको अभाव, मानसिक स्वास्थ्य, डिजिटल सुविधामा पहुँचको कमी, निर्णय प्रक्रियामा न्यून सहभागिता तथा युवा महिलाले भोगिरहेका सामाजिक चुनौतीलाई प्रमुख समस्याका रूपमा औंल्याइएको छ।

युवाहरूले स्थानीय रोजगारी सिर्जना तथा युवा रोजगार नीति निर्माण, युवा उद्यमशीलता र स्टार्टअपका लागि सहुलियतपूर्ण वित्तीय पहुँच, कृषि, पर्यटन, सूचना प्रविधि तथा डिजिटल अर्थतन्त्रमा युवा उद्यम प्रवर्द्धन गर्न माग गरेका छन्।

बजारसँग जोडिएको सीपमूलक शिक्षा, वैदेशिक रोजगारीमा जाने युवाका लागि सुरक्षित तथा मर्यादित रोजगारी र विदेशबाट फर्किएका युवाको सीप, पुँजी तथा अनुभवलाई स्थानीय उत्पादनमा उपयोग गर्ने नीति बनाउन पनि माग गरिएको छ।

त्यस्तै युवा महिलाका लागि नेतृत्व, रोजगारी तथा उद्यमशीलताको अवसर, पछाडि पारिएका समुदायका युवाका लागि लक्षित कार्यक्रम, स्थानीय तहको योजना तथा बजेट निर्माणमा युवाको अर्थपूर्ण सहभागिता र प्रत्येक स्थानीय तहमा ‘युथ इन्फर्मेसन एन्ड रिसोर्स सेन्टर’ स्थापना गर्न माग गरिएको छ।

डिजिटल साक्षरता, एआई तथा डिजिटल उद्यमशीलता, युवा मानसिक स्वास्थ्य, करियर काउन्सिलिङ, खेलकुद, कला, संस्कृति तथा सिर्जनशील उद्योगमा युवाको लगानी प्रवर्द्धन गर्नुपर्ने मागसमेत घोषणापत्रमा समेटिएको छ।

युवाका साझा सवालमा नियमित संवादका लागि ‘धादिङ युवा नेटवर्क’ स्थापना गर्न पनि प्रस्ताव गरिएको छ।

घोषणापत्रमा युवाहरूले सामाजिक सद्भाव, समानता र समावेशिता, स्थानीय विकास, युवा नेतृत्व विकास, वातावरण संरक्षण, डिजिटल प्रविधिको जिम्मेवार प्रयोग तथा सरोकारवालासँग सहकार्य गर्ने गरी आठबुँदे प्रतिबद्धता जनाएका छन्।

ROYM Nepal, Rotaract Club of Dhading, युवा मानव अधिकार रक्षक सञ्जाल धादिङ, ग्लोबल नेपाल धादिङ र परिवर्तन युवा महिला सञ्जाल धादिङको आयोजना तथा नीलकण्ठ नगरपालिका र aein को सहकार्यमा भएको कार्यक्रममा जिल्ला समन्वय समिति धादिङका उपप्रमुख कुलमान विश्वकर्मा, नीलकण्ठ नगरपालिकाका उपप्रमुख दीपक विश्वकर्मा, प्रमुख प्रशासकीय अधिकृत हरिदत्त कँडेल, रोटरी क्लब अफ धादिङका अध्यक्ष ईश्वर कँडेल, नेपाल पत्रकार महासंघ धादिङका अध्यक्ष सीताराम अधिकारी, रोट्रयाक्ट क्लबका सल्लाहकार अशोककुमार बस्नेत, रोयम नेपालका जिल्ला परियोजना संयोजक हरिशरण धिताल, रोयम नेपालका वित्त तथा प्रशासन व्यवस्थापक सीता श्रेष्ठ लगायतको सहभागिता थियो।

कार्यक्रममा सहभागी अतिथिहरूले युवाको बढ्दो बसाइँसराइ र वैदेशिक रोजगारीलाई रोक्न विदेश जानबाट रोक्नेभन्दा स्वदेशमै शिक्षा, सीप, पुँजी, प्रविधि, रोजगारी र उद्यमशीलताका अवसर सिर्जना गर्नुपर्नेमा जोड दिएका छन्।