अत्यावश्यक वस्तुको आपूर्ति सहज बनाउन नीलकण्ठ-३ को आग्रह

धादिङ । भोटेकोशी नदीमा आएको विनाशकारी बाढीका कारण धादिङसहित देशका विभिन्न जिल्लामा भौतिक, आर्थिक तथा मानवीय क्षति भएपछि नीलकण्ठ नगरपालिका-३ ले वडाभित्रका व्यवसायी, उद्योगी तथा व्यापारीलाई अत्यावश्यक वस्तु तथा सेवाको नियमित आपूर्ति सुनिश्चित गर्न आग्रह गरेको छ।

वडाले बुधबार सूचना जारी गर्दै प्राकृतिक विपद्का कारण दैनिक उपभोग्य वस्तु तथा अत्यावश्यक सामग्रीको आपूर्ति प्रणालीमा असहजता आउन सक्ने भन्दै उपभोक्ताको हितलाई प्राथमिकतामा राख्न व्यवसायीलाई अनुरोध गरेको हो।

विपद्को अवस्थालाई अवसरका रूपमा प्रयोग गरी कृत्रिम अभाव सिर्जना गर्ने, अत्यधिक मूल्य वृद्धि गर्ने तथा कालोबजारी गर्ने जस्ता गतिविधि नगर्न पनि वडाले चेतावनी दिएको छ।

त्यस्ता गतिविधि भएको पाइएमा प्रचलित कानुनबमोजिम आवश्यक कारबाहीका लागि सम्बन्धित निकायमा सिफारिस गरिने सूचनामा उल्लेख छ।

वडाले विपद्को समयमा सबै पक्षबाट सहयोग, सहकार्य र मानवीय व्यवहारको अपेक्षा गरेको जनाएको छ।

रसुवा हुँदै त्रिशुली नदीमा आएको बाढीले जिल्ला सदरमुकाम धादिङबेँसी आउने गजुरी गाउँपालिका-२ र सिद्दलेक-६ जोड्ने फुर्केखोला पुल बगाएको छ।

गजुरी-५ र सिद्दलेक-७ घाटबेसीको पुल, गजुरी-६ र सिद्दलेक-७ जोड्ने जरेखेतको पुल बगाएको छ ।

त्रिशुली नदीको पानी महेश दोभानबाट फर्किएर गल्छी-६ बैरेनीबजार जलमग्न भएको छ ।

बुधबार बिहान आएको बाढीले पुल बगाएपछि उक्त सडकखण्डमा आवागमन प्रभावित भएको छ।

पुल बगेसँगै फुर्केखोला आसपासका बासिन्दालाई जिल्ला सदरमुकाम आवतजावत गर्न समस्या भएको छ।

गल्छी, जिन्टेटार,मासटार र बेनिघाटको पुल यतिबेलासम्म सुरक्षित छ। बाढीको क्षतिको विवरण आउन बाकी रहेको छ।