कृष्णभीरमा ट्र्याक जोडियो,अब सडक सम्याउने काम सुरु हुँदै

धादिङ । पृथ्वी राजमार्गअन्तर्गत बेनीघाट रोराङ गाउँपालिका-७ स्थित कृष्णभीरमा पहिरो काटेर सडकको ट्र्याक जोडिएको छ। दुवैतर्फबाट एक्स्काभेटर परिचालन गरी खोलिएको ट्र्याक शनिबार जोडिएको हो।

ट्र्याक जोडिएसँगै अवरुद्ध सडक खुलाउने काम थप अघि बढेको छ। अब सडकलाई आवश्यक उचाइमा ल्याउन तथा सतह मिलाउन ‘डाउन’ गर्ने काम सुरु गरिने भएको छ।

पहिरो हटाएर ट्र्याक जोडिए पनि तत्कालै राजमार्गमा यातायात सञ्चालन भने नहुने नागढुंगा-मुग्लिन सडक आयोजनाले जनाएको छ।

सडक सम्याउने, आवश्यक मर्मत तथा यातायात सञ्चालनका लागि सुरक्षित बनाउने काम पूरा भएपछि मात्रै राजमार्ग खुलाइनेछ।

कृष्णभीरमा ठूलो पहिरो खसेपछि पृथ्वी राजमार्गको उक्त खण्ड अवरुद्ध भएको छ।