वैदेशिक रोजगारी : ६ महिना अवधीमा झण्डै ४ लाख नेपाली गए

काठमाण्डौ । चालु आर्थिक बर्षको पहिलो छ महिना साउनदेखि पुससम्म अर्थात छ महिनाको अवधिमा झन्डै चार लाख नेपाली कामदार वैदेशिक रोजगारीमा गएका छन्।

छ महिना अवधीमा तीन लाख ९३ हजार ६७ जना नेपाली वैदेशिक रोजगारीमा गएका वैदेशिक रोजगार विभागले जनाएको छ ।

मंसिरको तुलनामा पुसमा वैदेशिक रोजगारीमा जाने नेपाली कामदारको सङ्ख्या भने घटेको छ ।

मंसिरमा ८४ हजार २२६ जनाले वैदेशिक रोजगारीका लागि श्रम स्वीकृति लिएकोमा पुसमा ६७ हजार दुई सय ५८ जनाको मात्र श्रम स्वीकृति भएको छ ।

मंसिरको तुलनामा पुसमा झन्डै १७ हजारले कमी आएको हो ।

पुस महिनामा म्यानपावर कम्पनीमार्फत २९ हजार तीन सय १६ जना, नयाँ व्यक्तिगत श्रम स्वीकृतिमा १० हजार ८५ जना तथा श्रम स्वीकृति नवीकरणमार्फत २७ हजार दुई सय ३ जना वैदेशिक रोजगारीमा गएका छन् ।

यस्तै सरकारले पठाउने दक्षिण कोरिया तथा इजरायलमा छ सय ५५ जनाको श्रम स्वीकृति भएको छ । सबैभन्दा धेरै नेपाली कामदार यूएई र त्यसपछि साउदी अरेबिया र कतार जाने गरेका छन् ।