प्रजातन्त्र दिवसमा नीलकण्ठ र सिद्धलेकबीच मैत्रीपूर्ण कबड्डी प्रतियोगिता

धादिङ । आज फागुन ७ गते राष्ट्रिय प्रजातन्त्र दिवस,दिवसको अवसरमा धादिङबेसीमा मैत्रीपूर्ण पुरुष कबड्डी प्रतियोगिता सम्पन्न भएको छ।

धादिङ जिल्ला खेलकुद विकास समितिको आयोजना तथा धादिङ जिल्ला कबड्डी संघको व्यवस्थापनमा ७५ ओँ प्रजातन्त्र दिवसको अवसरमा आज नीलकण्ठ नगरपालिका र सिद्धलेक गाउँपालिकाबीच मैत्रीपूर्ण पुरुष कबड्डी प्रतियोगिता भएको हो ।

प्रतियोगितामा नीलकण्ठ नगरपालिका बिजयी भएको छ ।

नीलकण्ठ नगरपालिका–३ धादिङबेसीस्थित कभर्डहलमा भएको खेलमा नीलकण्ठले सिद्धलेकलाई ५५–४० को स्कोरमा पराजित गरेको हो ।

विजयी भएको नीलकण्ठलाई ट्रफी, मेडल तथा प्रमाणपत्र वितरण गरिएको थियो भने उपबिजेता सिद्धलेकलाई मेडल तथा प्रमाणपत्र प्रदान गरिएको थियो ।

धादिङ जिल्ला खेलकुद विकास समितिका अध्यक्ष प्रताप सिं तामाङको अध्यक्षतामा भएको कार्यक्रममा जिल्ला समन्वय समितिका प्रमुख नवराज अधिकारीको प्रमुख आतिथ्यता तथा नीलकण्ठ नगरपालिकाका उपप्रमुख दिपक विश्वकर्माको विशेष आतिथ्यता रहेको थियो ।

कार्यक्रममा सहायक प्रमुख जिल्ला अधिकारी मोहन न्यौपाने, नीलकण्ठ वडा नं १४ का वडाध्यक्ष नवराज दुवाडी, एमाले धादिङका उपाध्यक्ष अर्जुन श्रेष्ठ(गोर्खाली), जिल्ला युवा समितिका अध्यक्ष विनोद रिजाल, नेपाल रेडक्रस सोसाइटीका अध्यष दुर्लभ तामाङ,पत्रकार महासंघ धादिङका अध्यक्ष सिताराम अधिकारी लगाएतको आतिथ्यता रहेको थियो ।

कार्यक्रममा प्रमुख अतिथि जिसस प्रमुख अधिकारीले यस्ता प्रतियोगिताले राष्ट्रिय स्तरका खेलाडीहरू उत्पादनमा टेवा पु¥याउने भन्दै खेलकुद क्षेत्रलाई प्राथमिकतामा राख्न आग्रह गर्नुभयो ।

नगरपालिका उपप्रमुख विश्वकर्माले नीलकण्ठमा खेलकुदलाई प्राथमिकतामा राख्दै बर्सेनि विभिन्न खेलकुद प्रतियोगिता आयोजना गर्दै आएको बताउनुभयो ।

खेलकुदको विकास तथा स्थानीय प्रतिभालाई प्रोत्साहन गर्न मैत्रिपूर्ण प्रतियोगिता आयोजना गरिएको धादिङ जिल्ला खेलकुद विकास समितिका अध्यक्ष तामाङले बताउनुभयो।

मैत्रीपूर्ण कबड्डी प्रतियोगितालाई सभ्य तथा भव्य रुपमा सम्पन्न गर्न सहयोग गर्ने सम्पूर्णमा धन्यवाद ज्ञापन गर्दै अध्यक्ष तामाङले अब आउने दिनहरुमा अझै धेरै प्रतियोगिता निरन्तर आयोजना हुने बताउनुभयो ।

थप तस्विर हेर्न तलको लिंक क्लिक गर्नुहोस्

https://www.facebook.com/kalambagmati