महाशिवरात्रिमा नलाङ मोडेल एकेडेमीदेखी सिद्धबाबा मन्दिरसम्म महिला/पुरुष मिनि म्याराथुन दौड हुने

धादिङ । सिद्धलेक गाउँपालिका-२ स्थित नलाङमा महिला/पुरुष मिनि म्याराथुन दौड प्रतियोगीता हुने भएको छ ।

चक्रदेवी सामुदायिक समाज नेपालको आयोजना तथा द यिअर्ली ट्रष्ट,नलाङ मोडेल एकेडेमी, नेपाल एडुमेडिक ट्राभल एण्ड ट्रेकिङ कम्पनीको संयोजनमा महाशिवरात्रिको अवसरमा फागुन १४ गते ज्यामिरस्वाँरामा रहेको नलाङ मोडेल एकेडेमीदेखि सिद्धबाबा मन्दिरसम्म मिनि म्याराथुन प्रतियोगीता हुने भएको हो।

‘धार्मिक एवं ऐतिहासिक स्थलहरुको संरक्षण र पर्यटन प्रवर्धनमा युवाहरु’ भन्ने मुल नाराका साथ हरेक बर्ष शिवरात्रीको अवसरमा संचालन हुँदै आएको मिनि म्याराथुन दौड यस वर्ष पनि आयोजना गरिएको आयोजकले जनाएको छ।

प्रतियोगितामा ४ समुह बिभाजन गरिएको छ।

जसमा पुरुष १५ वर्ष भन्दा माथी, महिला १५ वर्ष भन्दा माथी, पुरुष १५ वर्ष भन्दा मुनि र महिला १५ वर्ष भन्दा मुनि रहेको आयोजकले जानकारी दिएको छ ।

वडा नं २,नलाङ मोडेल एकेडेमीवाट बिहान ७:३० बजेबाट सुरु भई सिद्धबाबा मन्दिर सिद्धलेकमा समापन हुने दौडमा प्रथम, द्धितिय, तृतीय र सान्तवना हुनेलाई नगद, प्रमाणपत्र र मेडल प्रदान गरिने आयोजकले जनाएको छ।

सहभागिहरुलाई जर्सि वितरण गरिने र सहभागिहरुलाई सिद्धबाबा मन्दिरमा नास्ताको समेत व्यवस्था गरिएको आयोजकले जानकारी दिएको छ ।

प्रतियोगीताबारे थप जानकारीको लागि : नलाङ मोडेल एकेडेमी
९८४३०५०१४४, ९८४६०४१७१८, ९८६१३७७६२२

सिद्धबाबा मन्दिरमा यस बर्ष पनि पाँचौ सिद्धलेक शिवरात्री मेला–२०८१ हुँदै छ ।

सिद्धलेक गाउँपालिकाको प्रायोजनमा सिद्धलेक ढेवाडाँडा समाज नेपालले मेला आयोजना गरेको हो ।

मेलामा राष्ट्रिय कलाकार चर्चित गायक अर्जुन सापकोटा, गायीका भूमिका गिरी, कौडा गायक पृथ्वी गुरुङ, गायक नवराज काप्री(भाले), गायिका बिन्दा परियार, गायक प्रदिप बराईली, डान्सर प्रवेश श्रेष्ठ, मोडल तथा सर्जक रविन गुरुङ, गायक मिलन विश्वकर्मा, मोडल तथा जादुगर अमिस उपरकोटी, मोडल टिका भुजेल र गायक विकास राना मगर लगाएत स्थानीय कलाकारहरुको प्रस्तुति रहने आयोजकले जनाएको छ।

आन्तरिक तथा बाह्य पर्यटन प्रवद्र्धनका लागि सिद्धलेक ढेवाडाँडा समाज नेपालले गाउँपालिकाको समन्वयमा विगत केही बर्षदेखी सिद्धलेक धार्मिक पर्यटन तथा साँस्कृतिक महोत्सवको आयोजना गर्दै आएको छ।

जिल्लाकै ऐतिहासिक धार्मिक तथा पर्यटन स्थल धादिङ्गको सिद्धलेक गाँउपालिकाभित्र पर्ने साविकको नलाङ्ग र सलाङ्ग (हाल वडा नं. २, ३ र ४) को सिमानामा अवस्थित सिद्धेश्वर महादेवको नामबाट नामाकरण भएको यस सिद्धलेक तथा ढेवाडाँडामा महादेवको पूजा अर्चना गर्न शिवरात्रीमा हरेक बर्ष श्रद्धालु भक्तजनहरूको ठूलो मेला लाग्ने गर्दछ।

सिद्धलेककै साथमा रहेको १ हजार ५२५ मिटर अग्लो ढेवाडाँडा रहेको छ।

त्यहाँबाट धादिङ जिल्लाको सल्यानटार बाहेक साविकको ४९ वटा गाउँ विकास समितिहरु, हिमश्रृङ्खला, मनोरम हरियाली, जैविक विविधता र अन्य थुप्रै मनोरम दृष्यहरु देखिन्छन्।

सिद्धलेकलाई धार्मिक एवं पर्यटकीय दृष्टिकोणले जिल्लाकै अत्यन्तै महत्वपूर्ण स्थलको रूपमा लिइन्छ । तर पर्यटन प्रवद्धन भने हुन सकेको छैन।

सरोकारावालहरुले सिद्धलेकको सामाजिक, सांस्कृतिक, धार्मिक र आर्थिक फाइदाका बारेमा व्यापक प्रचारप्रसार गर्न आवश्यक रहेको छ।

हेर्नुहोस् सिद्धबाबा र ढेवाडाँडाका केही तस्विर