एशियन कप छनोट : नेपालले उज्वेकिस्तानसँग खेल्दै,विजेताले एशियन कप खेल्ने

काठमाण्डौ । एएफसी महिला एशियन कप सन् २०२६ को छनोटअन्तर्गत नेपालले आज उज्वेकिस्तानसँग खेल्दैछ ।

खेल नेपाली समयअनुसार राति सवा ८ बजेदेखी उज्वेकिस्तानको तास्केन्तमा रहेको बुनयोदकोर रङ्गशालामा शुरु हुनेछ ।

समूह ‘एफ’ मा रहेको नेपाल तीन खेलमा छ अङ्कसहित तालिकाको दोश्रो स्थान र समान खेलमा छ अङ्क नै बनाएको उज्वेकिस्तान शीर्ष स्थानमा छ ।

आज हुने समूह चरणको तेस्रो तथा अन्तिम निर्णायक खेलको विजेताले आउँदो वर्ष अस्ट्रेलियामा हुने एशियन कप खेल्नेछ ।

पछिल्लो फिफा वरियतामा नेपाल एक सयौं स्थानमा रहँदा उज्वेकिस्तान ५१औं स्थानमा छ ।

आफ्नो पहिलो खेलमा नेपालले लाओसलाई ९–० र दोश्रो खेलमा श्रीलङ्कालाई ८–० गोलले हराएको थियो ।

यस्तै उज्वेकिस्तानले पनि आफ्नो पहिलो खेलमा श्रीलङ्कालाई १०–० र लाओसलाई ७–० गोलले हराएको थियो ।

यदि आजको खेलमा अङ्क र गोल अन्तर पनि बराबर भएमा एएफसी महिला एशियन कप प्रतियोगिताको नियमावली अनुसार सिधै पेनाल्टी सुटआउट हुनेछ ।

महिला एशियन कप छनोटमा ३४ वटा टोलीलाई आठ वटा समूहमा विभाजन गरिएको छ ।

हरेक समूहको विजेताले आउँदो वर्ष अस्ट्रेलियामा हुने एशियन कप खेल्नेछन् । १२ वटा टोली सहभागी हुने प्रतियोगितामा आयोजक अस्ट्रेलियासँगै चीन, दक्षिण कोरिया र जापान छनोट भइसकेका छन् ।