बेनिघाट रोराङमा पालिकासँग महिलाका कुरा विषयक अन्तरक्रिया

धादिङ । धादिङको बेनिघाट रोराङ गाउँपालिकामा पालिकासँग महिलाका कुराू विषयक अन्तरक्रिया गरिएको छ। अन्तरराष्ट्रिय श्रमिक महिला दिवस २०२५ को पूर्वसन्ध्यामा गाउँपालिकाले मंगलबार अन्तरक्रिया कार्यक्रम आयोजना गरेको हो।

कार्यक्रममा महिला श्रमिकहरूको हक, अधिकार, अवसर, र स्थानीय तहसँगको सम्बन्धबारे छलफल गरिएको थियो ।

कार्यक्रमका प्रमुख वक्ता बागमती प्रदेशसभाका पूर्व साँसद एवम् नेकपा माओवादी केन्द्रका केन्द्रिय सदस्य कञ्चन खनालले महिला श्रमिकहरूको योगदानलाई सम्मान गर्दै उनीहरूको हकहित संरक्षणका लागि स्थानीय तहले प्रभावकारी नीति ल्याउनु आवश्यक रहेको बताउनुभयो।

खनालले महिला श्रमिकहरू समाज र राष्ट्र निर्माणका लागि महत्वपूर्ण योगदान दिने भएकाले उनीहरूको हक र अधिकार सुनिश्चित गर्न स्थानीय सरकारलाई जिम्मेवार बन्नु पनि आग्रह गर्नुभयो।

त्यसैगरि कार्यक्रममा सहभागी नेकपा एमालेका प्रतिनिधि हिरा रेग्मी, नेकपा माओवादी केन्द्रका प्रतिनिधि संगिता कँडेल लगायतले महिला श्रमिकहरूले भोग्नुपरेका चुनौती, न्यूनतम पारिश्रमिक, सामाजिक सुरक्षा, न्याय, सुरक्षित कार्यस्थल, डिजिटल प्लेटफर्ममा महिलाको पहुँच जस्ता विषयमा आफ्ना धारणा राखेका थिए।

कार्यक्रममा गाउँपालिकाका अध्यक्ष कृष्णबहादुर थपलिया, उपाध्यक्ष टापबहादुर श्रेष्ठ, प्रमुख प्रशासकीय अधिकृत नर्बदा घिमिरे लगायतले कार्यक्रममा पालिकासँग सहकार्य गरेर महिला श्रमिकहरूको सशक्तीकरणका लागि विभिन्न कार्यक्रम ल्याउने प्रतिबद्धता व्यक्त गर्नुभयो।

कार्यक्रममा सहभागी महिलाहरूले स्थानीय तहसँग श्रमिक महिलाहरूका माग सम्बोधन गर्न आग्रह गरेका थिए।

कार्यक्रम अन्त्यमा महिला श्रमिकहरूको समस्या समाधानका लागि नीति निर्माणमा उनीहरूको सहभागिता बढाउने प्रतिबद्धता जनाइएको थिए ।

विश्वभर प्रत्येक वर्ष मार्च ८ मा अन्तर्राष्ट्रिय श्रमिक महिला दिवस मनाउँदै आएको छ।नेपालमा पनि बिभिन्न कार्यक्रम गरी मनाउने गरिएको छ।यस वर्ष सबै महिला तथा बालिकाको लागि अधिकार, समानता र सशक्तीकरण भन्ने मुल नाराका साथ दिवस मनाईदै छ।