त्रिपुरासुन्दरीको भीमोदय माविमा ‘पार्वती’ स्मृति अक्षयकोष स्थापना

धादिङ। त्रिपुरासुन्दरी गाउँपालिका वडा नं ६ गोलाङस्थित भीमोदय माविमा पार्वती पाण्डे अधिकारी स्मृति अक्षयकोष स्थापना गरिएको छ।

शुक्रबार एक कार्यक्रमका बिच अधिकारीका परिवारजनले विद्यालयमा अध्ययनरत गरिब तथा जेहेन्दार विद्यार्थीका लागि एक लाख ६१ हजार छ सय १६ रुपैयाँको छात्रवृत्ति अक्षयकोष घोषणा भएको हो ।

जसमा पार्वतीको घरपरिवारबाट एक लाख ११ हजार एक सय ११ र माइती परिवारबाट ५० हजार पाँच सय पाँच रुपैयाँ रहेको छ।

पार्वतीका पति शम्भु अधिकारी, पिता घनश्याम पाण्डेलगायत परिवारजनले त्रिपुरासुन्दरी गाउँपालिका अध्यक्ष राजु उप्रेतीको उपस्थितिमा विद्यालय व्यवस्थापन समिति अध्यक्ष देवबहादुर बसौला, प्रधानाध्यापक बिष्णुहरि शाहलाई अक्षयकोष रकमको चेक हस्तान्तरण गनुभएको हो ।

अक्षय कोष स्थापनाका लागि बिद्यालयलाई चेक हस्तान्तरण गर्न आयोजना गरिएको कार्यक्रमलाई पृथ्वीनारायण क्याम्पसका पूर्व क्याम्पस प्रमुख प्राडा दिलबहादुर क्षत्री,त्रिपुरासुन्दरी गाउँपालिका अध्यक्ष राजु उप्रेती,कृषि बजार व्यवस्थापन समिति अध्यक्ष नवराज दुवाडी,धादिङ-पोखरा सम्पर्क समाजका अध्यक्ष सरस्वती श्रेष्ठ,पार्वतीका जेठाजु गोकर्ण अधिकारी,पार्वतीका पति शम्भु अधिकारी,भीमोदय माविका प्रधानाध्यापक बिष्णुहरी शाह, रि माविका प्रधानाध्यापक (पार्वतीका भिनाजु) रामचन्द्र सिटौला, पार्वतीका जेठाजु बलराम अधिकारी लगायतले स्वर्गिय पार्वतीको सम्झना गर्दै अक्षय कोषको सदुपयोग गरेर पार्वतीलाई अमर बनाउन सक्नुपर्नेमा जोड दिएका थिए।

त्रिपुरासुन्दरीको गोलाङ जन्म, सिद्धलेक-२ तारनलाङमा बसोबास गर्ने पार्वतीको २०८१ माघ १६ गते शहिद दिवसको दिन ३७ वर्षको उमेरमा पोखरामा निधन भएको थियो।