धादिङमा जारी रैथाने खाना तथा कृषि महोत्सवमा खुलेआम जुवाको खाल

धादिङ । गजुरी गाउँपालिका-५ गलौदीमा तेस्रो धादिङ रैथाने खाना तथा कृषि पर्यटन व्यापार महोत्सव जारी रहेको छ।

जिल्ला होटल संघ धादिङको आयोजना तथा हिमालयन बियरको मुख्य प्रायोजनमा बिहिबारदेखी त्रिशुली किनार र पृथ्वी राजमार्गको विचमा रहेको गलौदी खेल मैदानमा महोत्सव जारी रहेको छ।

गजुरी गाउँपालिका संरक्षक रहेको महोत्सवको आज चौथो दिन हो । महोत्सवमा खुलेआम जुवा खेलाइएको छ।

रमाइलो खेल, लक्की सेभेन डट गेम लगायत नाम दिएर विभिन्न प्रकारका जुवाका खेलहरु खेलाइएको छ।यसतर्फ न आयोजकले ध्यान दिए, न त संरक्षक गजुरी गाउँपालिका नै बोलेको छ ।

स्थानीय प्रशासन समेत मौन रहेको छ ।रैथाने नाम दिएको महोत्सवमा स्थानीय उत्पादनहरु भेटिदैनन् । तर महोत्सवलाई व्यापार मात्र बनाइदा महोत्सवमा खुलेआम जुवा खेलाइएको छ।

महोत्सवमा यस्ता प्रकारका जुवा खेलाउन नपाइने धादिङका प्रमुख जिल्ला अधिकारी सुमन घिमिरेले बताउनुभयो।उहाँले भन्नुभयो, ‘महोत्सव भित्र जुवातास खेलाउन र जाँड रक्सी विक्रि वितरण गर्न पाइदैन,हामी तत्काल रोक्छौं ।’