सत्ता गठबन्धन देशको लागि भारिबोध भयो : खेम लोहनी

धादिङ,१७ कात्तिक ।
धादिङ क्षेत्र नं २ का नेकपा एमालेका प्रतिनिधिसभा सदस्य उम्मेदवार खेम लोहनीले सत्ता गठबन्धन देशको लागि भारिबोध भएको बताउनुभएको छ ।

बिहिबार एमाले र राप्रपाको संयुक्त चुनावी अभियान अन्तर्गत रुवीभ्याली गाउँपालिका–४ सेर्तुङको चालिसेमा भएको सभामा बोल्दै लोहनीले सो कुरा बताउनुभएको हो ।

सत्ता गठबन्धनले राम्रो काम गर्न नसक्ने, अहिले पनि नगरेको र भविष्यमा पनि गर्न नसक्ने, जनतालाई सुख, सुबिधा केही पनि दिन नसक्ने भन्दै लोहनीले गठबन्धनलाई मंसिर ४ को निर्वाचन पछि पन्छाउनु पर्ने बताउनुभयो ।जितलाई निश्चित गर्नको लागि एमाले र राप्रपा बिच तालमेल भएको भन्दै लोहनीले गाउँ ठाउँको विकासको लागि एमाले–राप्रपाका उम्मेदवारलाई जिताउन आग्रह गर्नुभएको छ ।

लोहनीले पहिलेको निर्वाचनमा तिप्लिङसम्म बाटो पुराउने गरेको बाचा अनुसार हाल तिप्लिङसम्म नै बाटो पुगेको बताउनुभयो । धादिङबेशी साङकोष तिप्लिङ सडक मेरो पाँच बर्षे कार्यकालको महत्वपुर्ण काम भएको र यसलाई पहिलो प्राथमिकतामा राख्ने बताउनुभएको छ ।
कार्यक्रममा राप्रपाबाट प्रदेश सासद उम्मेदवार डम्बर तामाङले धादिङमा एमाले र राप्रपाबिच चुनावी तालमेल भएको र आफु स्थानिय उम्मेदवार भएकाले आफ्नो गाउँ ठाउँको विकास गर्ने र स्थानीयस्तरमा जनताका समस्या र पीरमर्कामा साथमा रहन सक्ने उम्मेदवारलाई मत दिन मतदाताहरुसंग अनुरोध गर्नुभयोे ।