चेपाङ समुदायले आज न्वागी पर्व मनाउँदै : धादिङ, चितवन र मकवानपुरमा सार्वजनिक बिदा

काठमाण्डाै । चेपाङ समुदायले आज छोनाम अर्थात् न्वागी पर्व मनाउँदैछन् ।

चेपाङ समुदायको राष्ट्रिय धार्मिक पर्वका रूपमा हरेक वर्ष भदौ २२ मा यो पर्व मनाउने चलन छ ।

२०६३ सालदेखि चेपाङ सङ्घको पहलमा सामूहिक रूपमा उत्सवकै रूपमा न्वागी मनाउन थालिएको थियो ।

उनीहरुले सामूहिक रूपमा भेला भएर विभिन्न सांस्कृतिक कार्यक्रम गरी मनाउँदै आएका छन् ।

नेपाल चेपाङ सङ्घका केन्द्रीय अध्यक्ष गोविन्दराम चेपाङका अनुसार यस वर्ष चितवनको इच्छाकामना गाउँपालिका–६ कालिखोलामा देशभरका चेपाङ एकै ठाउँमा भेला भएर न्वागी मनाउन लागिएको छ।

चेपाङ बाहुल्यता रहेको चितवन, मकवानपुर, धादिङ र गोरखामा हरेक वर्ष पालैपालो गरी भदौ २२ गते राष्ट्रिय पर्व न्वागीलाई उत्सवका रूपमा मनाउने गरिएको उहाँले बताउनुभयो ।

आज सामूहिक रूपमा न्वागी मनाउँदै आए पनि आफ्नो कुलअनुसार चेपाङ समुदायले भदौको पूर्णिमादेखि महिनाभर न्वागी मनाउने परम्परा छ ।

चेपाङ समुदायमा पितृलाई नचढाइ र पूजा नगरी नयाँ फलफूल र अन्नपात खान हुँदैन भन्ने मान्यता छ।

न्वागी पर्वका दिन घैया धानको चामल, कागुनो, पिँडालुलगायत अन्न र फलफूल पितृलाई चढाउने गरिन्छ ।

यो पर्वलाई चेपाङले नयाँ अन्न खान शुरु गर्ने दिनका रूपमा पनि लिन्छन् । राष्ट्रिय जनगणना २०७८ का अनुसार नेपालमा ८४ हजार तीन सय ६४ जना चेपाङ छन् ।

यसैबीच बागमती प्रदेश सरकारले चेपाङ समुदायको छोनाम (न्वागी) को अवसरमा प्रदेशका तीन वटा जिल्ला धादिङ, चितवन र मकवानपुरमा सार्वजनिक बिदा दिइएको जनाएको छ ।