धादिङको होटल संघका अध्यक्ष र केन्द्रीय सचिवद्वारा सञ्चालित होटल कारबाहीमा परे,तीन होटललाई ८५ हजार जरिवाना

धादिङ । धादिङमा पृथ्वी राजमार्ग आसपासका होटल तथा खाजा पसलमा गरिएको अनुगमनका क्रममा तीन होटललाई ८५ हजार रुपैयाँ जरिवाना गरिएको छ।

बिक्रीका लागि राखिएका खानेकुरामा किरा परेको, फ्रिजमा भण्डारण गरिएका खाद्य सामग्री अस्वस्थकर अवस्थामा रहेको भेटिएपछि तीन होटल कारवाहीमा परेका हुन्।

प्रमुख जिल्ला अधिकारी लक्ष्मी गौतम पाण्डेयको संयोजकत्वमा गरिएको बजार तथा होटल अनुगमनका क्रममा उपभोक्ताको स्वास्थ्यमा प्रत्यक्ष असर पर्ने खालका गम्भीर कैफियत फेला परेपछि कारबाही गरिएको हो।

अनुगमनका क्रममा जिल्ला होटल संघ धादिङका अध्यक्ष रामशरण सिलवालले सञ्चालन गर्नुभएको बेनिघाट रोराङ गाउँपालिका-३ सितलबजारस्थित होटल तीनभाइ लाई १० हजार रुपैयाँ जरिवाना गरिएको छ।

त्यसैगरी होटल व्यवसायी महासंघका केन्द्रीय सचिव सन्तोषकुमार थापाले सञ्चालन गर्नुभएको बेनिघाट रोराङ-३ सलाङघाटस्थित सफल होटल लाई २५ हजार रुपैयाँ जरिवाना गरिएको छ।

यस्तै बेनिघाट रोराङ-३ सितलबजारस्थित ब्लु ह्यावन होटल लाई सबैभन्दा बढी ५० हजार रुपैयाँ जरिवाना गरिएको छ।

होटलमा बिक्रीका लागि राखिएका खानेकुरामा किरा परेको,फ्रिजभित्र राखिएका खानेकुरामा समेत किरा परेको, होटल परिसर फोहोर रहेको तथा खाद्य सामग्रीको व्यवस्थापन मापदण्डअनुसार नभएको र यसअघि पनि अनुगमनका क्रममा कैफियत भेटिएको कारण पुनः कडा कारबाही गरिएको उद्योग तथा वाणिज्य कार्यालय धादिङका प्रमुख एवं अनुगमन टोलीका सदस्य सचिव चुडामणि पुरीले जानकारी दिनुभयो।

अनुगमन टोलीले राजमार्ग क्षेत्रमा यात्रु तथा उपभोक्तालाई सेवा दिने होटल तथा रेस्टुरेन्टहरूले खाद्य सुरक्षा र सरसफाइलाई अनिवार्य रूपमा पालना गर्नुपर्ने जनाएको छ।

उपभोक्ताको स्वास्थ्यसँग प्रत्यक्ष सम्बन्धित विषयमा कुनै सम्झौता नहुने स्पष्ट पार्दै प्रशासनले यस्ता अनुगमनलाई आगामी दिनमा अझ कडाइका साथ निरन्तरता दिइने जनाएको छ।

राजमार्ग क्षेत्रमा दैनिक हजारौं यात्रुको आवतजावत हुने भएकाले गुणस्तरहीन तथा अस्वस्थकर खाद्य सामग्री बिक्री वितरणले सार्वजनिक स्वास्थ्यमा गम्भीर असर पार्न सक्ने भन्दै प्रशासनले होटल व्यवसायीलाई खाद्य मापदण्ड कडाइका साथ पालना गर्न निर्देशन दिएको छ।

अनुगमनमा प्रमुख जिल्ला अधिकारी पाण्डेयसँगै प्रहरी उपरीक्षक सुमित खड्का, राष्ट्रिय अनुसन्धान जिल्ला कार्यालय धादिङका प्रमुख उपअनुसन्धान निर्देशक हुमकान्त पाण्डे, पशु सेवा कार्यालय धादिङका प्रमुख डा. बब्लु ठाकुर, उद्योग तथा वाणिज्य कार्यालय धादिङका प्रमुख चुडामणि पुरी, सहायक प्रमुख जिल्ला अधिकारी ओमप्रकाश भट्टराई, धादिङ उद्योग वाणिज्य संघका कार्यालय प्रमुख रमेश अधिकारी, राष्ट्रिय उपभोक्ता मञ्च धादिङका अध्यक्ष नारायणलाल श्रेष्ठ,पत्रकार महासङका अध्यक्ष सिताराम अधिकारी लगायतको सहभागिता रहेको थियो।