पाँचौ सिद्धलेक शिवरात्री मेला-२०८१ महोत्सवको तयारी पूरा,कृषीमन्त्रीले उद्घाटन गर्ने

अडियोमा सुन्नुहोस

धादिङ । धादिङको सिद्धलेक गाउँपालिका स्थित सिद्धलेक (सिद्धबाबा मन्दिरमा) भोलि बुधबार महाशिवरात्री पर्वको अवसरमा पाँचौ सिद्धलेक शिवरात्री मेला-२०८१ हुँदै छ।

सिद्धलेक ढेवाडाँडा समाज नेपालले सिद्धलेक गाउँपालिकाको प्रायोजनमा आन्तरिक तथा वाह्य पर्यटन प्रवद्धन गर्ने उद्देश्यले आयोजना गरेको पाँचौ सिद्धलेक शिवरात्री मेलाको सम्पूर्ण तयारी पूरा भएको सिद्धलेक ढेवाडाँडा समाजका अध्यक्ष दिल नारायण श्रेष्ठले जानकारी दिनुभयो ।

महोत्सवका लागि मञ्च निर्माण, स्टल निर्माण, स्वागत गेट निर्माण, सरसफाई, पानी, स्वयम् सेवक, रक्तदान कार्यक्रमको तयारीसँगै सम्पूर्ण पूर्वाधार निर्माण भईसकेको उहाँले बताउनुभयो ।

मेलाको नेपाल सरकारका कृषी तथा पशुपन्छी विकास मन्त्री रामनाथ अधिकारीले उद्घाटन गर्ने तय भएको आयोजक समाजका सल्लाहकार एव रेडक्रस नलाङ उपशाखाका सभापति अमृत गुरुङ (तिलक) ले जानकारी दिनुभयो।

‘हाम्रो सिद्धलेक हाम्रो पहिचान,विकास र समृद्धीको लागि पर्यटन’ भन्ने मूल नारासहित आयोजना गरिएको मेलामा राष्ट्रिय कलाकार चर्चित गायक अर्जुन सापकोटा, गायीका भूमिका गिरी, कौडा गायक पृथ्वी गुरुङ, गायक नवराज काप्री(भाले), गायिका बिन्दा परियार, गायक प्रदिप बराईली, डान्सर प्रवेश श्रेष्ठ, मोडल तथा सर्जक रविन गुरुङ, गायक मिलन विश्वकर्मा, मोडल तथा जादुगर अमिस उपरकोटी, मोडल टिका भुजेल र गायक विकास राना मगर लगाएत स्थानीय कलाकारहरुको प्रस्तुति रहने गुरुङले बताउनुभयो।

यसैगरी महोत्सव स्थल परिसरमा रक्तदान कार्यक्रम समेत हुने भएको छ । नेपाल रेडक्रस सोसाईटी नलाङ उपशाखाको आयोजना, सिद्धलेक ढेवाडाँडा समाजको सहआयोजना तथा रक्त सञ्चार सेवा केन्द्र धादिङको प्राविधिक सहयोगमा बिहान ८ बजेदेखी अपरान्ह ४ बजेसम्म रक्तदान कार्यक्रम हुनेछ ।

सिद्धलेकमा आन्तरिक तथा वाह्य पर्यटन प्रवद्धन गर्ने उद्देश्यले विगत ५ बर्ष यता मेलालाई निरन्तरता दिईएको सल्लाहाकार गुरुङले बताउनुभयो ।

आन्तरिक तथा बाह्य पर्यटन प्रवद्र्धनका लागि सिद्धलेक ढेवाडाँडा समाज नेपालले गाउँपालिकाको समन्वयमा विगत केही बर्षदेखी सिद्धलेक धार्मिक पर्यटन तथा साँस्कृतिक महोत्सवको आयोजना गर्दै आएको छ ।

आयोजकले उक्त मेलामा सहभागी हुन सम्पूर्णलाई अपिल गरेको छ । जिल्लाकै ऐतिहासिक धार्मिक तथा पर्यटन स्थल धादिङ्गको सिद्धलेक गाँउपालिकाभित्र पर्ने साविकको नलाङ्ग र सलाङ्ग (हाल वडा नं. २, ३ र ४) को सिमानामा अवस्थित सिद्धेश्वर महादेवको नामबाट नामाकरण भएको यस सिद्धलेक तथा ढेवाडाँडामा महादेवको पूजा अर्चना गर्न शिवरात्रीमा हरेक बर्ष श्रद्धालु भक्तजनहरूको ठूलो मेला लाग्ने गर्दछ।

सिद्धलेककै साथमा रहेको १ हजार ५२५ मिटर अग्लो ढेवाडाँडा रहेको छ।

त्यहाँबाट धादिङ जिल्लाको सल्यानटार बाहेक साविकको ४९ वटा गाउँ विकास समितिहरु, हिमश्रृङ्खला, मनोरम हरियाली, जैविक विविधता र अन्य थुप्रै मनोरम दृष्यहरु देखिन्छन्।

सिद्धलेकलाई धार्मिक एवं पर्यटकीय दृष्टिकोणले जिल्लाकै अत्यन्तै महत्वपूर्ण स्थलको रूपमा लिइन्छ ।

तर पर्यटन प्रवद्धन भने हुन सकेको छैन।सरोकारावालहरुले सिद्धलेकको सामाजिक, सांस्कृतिक, धार्मिक र आर्थिक फाइदाका बारेमा व्यापक प्रचारप्रसार गर्न आवश्यक रहेको छ।