दोस्रो सिद्धलेक म्हेन्दोमाया कप फुटबल प्रतियोगिता असोज २४ देखि,विजेतालाई १ लाख ५ हजार पुरस्कार

धादिङ । सिद्धलेक गाउँपालिका-१, धादिङमा ‘दोस्रो सिद्धलेक म्हेन्दोमाया कप-२०८३’ ९ ए साइड खुला फुटबल नकआउट प्रतियोगिता आयोजना हुने भएको छ ।

म्हेन्दो माया युवा समाज, सिद्धलेक गाउँपालिका-१ को आयोजना तथा नयाँबस्ती प्रवासी समाजको सह-आयोजनामा असोज २४ गतेदेखि २७ गतेसम्म सिद्धलेक गाउँपालिका-१ स्थित नयाँबस्ती बाँझोगरा म्हेन्दोमाया खेलमैदानमा प्रतियोगिता सञ्चालन हुने भएको हो।

प्रतियोगिताको विजेताले नगद १ लाख ५ हजार रुपैयाँसहित ट्रफी, मेडल र प्रमाणपत्र प्राप्त गर्नेछ ।

यस्तै दोस्रो हुने टोलीले नगद ५२ हजार रुपैयाँसहित मेडल र प्रमाणपत्र तथा तेस्रो हुने टोलीले नगद २५ हजार रुपैयाँसहित मेडल र प्रमाणपत्र प्राप्त गर्ने आयोजकले जनाएको छ ।

यसैगरी व्यक्तिगत विधातर्फ उत्कृष्ट खेलाडीलाई नगद ५ हजार रुपैयाँसहित मेडल र प्रमाणपत्र प्रदान गरिनेछ भने प्रतियोगिताको सर्वाधिक गोलकर्ता र उत्कृष्ट गोलरक्षकलाई जनही नगद ३ हजार रुपैयाँसहित मेडल र प्रमाणपत्र प्रदान गरिने आयोजकले जनाएको छ ।

‘स्वास्थ्यको लागि खेलकुद, राष्ट्रको लागि खेलकुद’ भन्ने मूल नाराका साथ आयोजना हुन लागेको प्रतियोगितामा सहभागी हुन चाहने टिमले असोज १२ गतेदेखि २३ गतेसम्म टिम दर्ता गराउन सक्नेछन् ।

टिम दर्ताका लागि प्रवेश शुल्क ८ हजार ५ सय रुपैयाँ तोकिएको छ ।

म्हेन्दो माया युवा समाजका अध्यक्ष पेमा छिरिङ लामाले प्रतियोगितालाई व्यवस्थित, भव्य र सभ्य रूपमा सञ्चालन गर्ने तयारी भइरहेको बागमती कलमलाई जानकारी दिनुभयो ।

उहाँले स्थानीयस्तरमा रहेका खेलाडीको प्रतिभा उजागर गर्दै खेलकुदप्रति युवाको आकर्षण बढाउने उद्देश्यले प्रतियोगितालाई यस वर्ष पनि निरन्तरता दिईएकोे बताउनुभयो ।

अध्यक्ष लामाले प्रतियोगितामा धादिङलगायत विभिन्न स्थानबाट खेलाडी तथा टोलीको सहभागिता रहने अपेक्षा गरिएको भन्दै खेलाडी, खेलप्रेमी तथा स्थानीयवासीलाई प्रतियोगितामा सहभागी भई सफल बनाउन सहयोग गर्न आग्रह गर्नुभयो ।

प्रतियोगितासँगै सांस्कृतिक कार्यक्रमसमेत आयोजना गरिने आयोजकले जनाएको छ ।

गत वर्ष सोही खेल मैदानमा प्रथम सिद्धलेक म्हेन्दोमाया कप असोज ६ गतेदेखी ९ गतेसम्म सञ्चालन भएको थियो ।

प्रतियोगिताबारे थप जानकारी तथा टिम दर्ताका लागि ९७६३२४०६७४, ९८६३२०८७०१, ९८६९३७८१२४, ९७६३७७२३२३ र ९७६३६८५१५५ मा सम्पर्क गर्न सकिनेछ ।