धादिङ जिल्ला स्तरिय राष्ट्रपति रनिङ शिल्ड नीलकण्ठ नगरपालिकालाई

धादिङ,२६ फागुन ।
१२ औं धादिङ जिल्ला स्तरीय राष्ट्रपति रनिङ शिल्ड प्रतियोगिता नीलकण्ठ नगरपालिकाले जितेको छ ।

धादिङ खेलकुद विकास समितिको आयोजना तथा गजुरी गाउँपालिकाको व्यवस्थापनमा गजुरी गाउँपालिका–५ स्थित गलौँदी खेलमैदानमा सम्पन्न राष्ट्रपति रनिङ शिल्ड नीलकण्ठले जितेको हो ।

नीलकण्ठ नगरपालिकाले २० स्वर्ण, ११ रजत र १५ कास्य गरी ४६ पदक प्राप्त गर्दै १२ औं राष्ट्रपति रनिङ शिल्ड जितेको हो ।

दोस्रो स्थान धुनिबेशी नगरपालिकाले हासिल गरेको छ । धुनिबेशीले ८ स्वर्ण, ९ रजत र ८ कास्य गरी २५ पदक प्राप्त ग¥यो ।

५ स्वर्ण, ६ रजत र ८ कास्यसहित १९ पदकसहित बेनिघाट रोराङ गाउँपालिका तेस्रो भयो भने ३ स्वर्ण, ४ रजत र ६ कास्यसहित गजुरी चौथो भएको छ ।

प्रतियोगितामा थाक्रेले ३ स्वर्ण, २ रजत र १ कास्य प्राप्त गर्यो ।

ज्वालामुखीले २ स्वर्ण, १ रजत र २ कास्य, खनियाबासले २ स्वर्ण, १ कास्य, त्रिपुरासुन्दरीले १ स्वर्ण, ३ रजत र २ कास्य, सिद्धलेकले ५ रजत, ४ कास्य, रुवी भ्यालीले १ रजत र गल्छीले १ कास्य प्राप्त गरेको जिल्ला खेलकुद विकास समिति धादिङका अध्यक्ष प्रताप सिं तामाङले जानकारी दिनुभयो ।

फागुन २३ गतेदेखि सुरु भएको प्रतियोगिता बिहिबार सम्पन्न भएको हो। प्रतियोगितामा भलिबल, कबड्डी, एथलेटिक्स, ज्याभलिन थ्रो, सटपुट, कँराते, तेक्वान्दो लगायतका खेलहरू भएको थियो ।

प्रतियोगितामा पालिकाबाट छनोेट भएर आएका १८ वर्ष सम्मका छात्र/छात्राहरुले भाग लिएका थिए । जिल्लाबाट छनोट भएका खेलाडीहरु प्रदेश छनोट पार गर्दै राष्ट्रिय प्रतियोगिताको लागि खेल्न पाउने छन् ।

यसअघिको ११ औं धादिङ जिल्ला स्तरीय राष्ट्रपति रनिङ शिल्ड प्रतियोगिता धुनीबेसी नगरपालिकाले जितेको थियो ।