नेपालले आज सिंगापुरसँग अन्तर्राष्ट्रिय मैत्रीपूर्ण फुटबल खेल्दै

काठमाण्डौ । नेपाली राष्ट्रिय फुटबल टोलीले आज सिंगापुरसँग अन्तर्राष्ट्रिय मैत्रीपूर्ण खेल खेल्दैछ।

खेल नेपाली समयअनुसार आज बेलुका सवा ६ बजे सिंगापुर नेसनल स्टेडियममा शुरू हुनेछ।नेपालले ३६ वर्षपछि सिंगापुरसँग फुटबल खेल खेल्न लागेको हो।

नयाँ प्रशिक्षक म्याट रोस नियुक्त भएपछि नेपालको पहिलो अन्तर्राष्ट्रिय खेल अन्तरगत नेपाल पाँच महिनापछि अन्तर्राष्ट्रिय फुटबलमा फर्केको छ।फिफा वरियतामा नेपालभन्दा सिंगापुर १५ स्थान माथि छ।

सिंगापुर १६०औं स्थानमा छ भने नेपाल १७५औं स्थानमा छ।

यसअघि पछिल्लो पटक सन् १९८९ मा फिफा विश्वकप छनोटअन्तर्गत नेपाल र सिंगापुरबीच खेल भएको थियो।नेपाल र सिंगापुरले अहिलेसम्म चार पटक खेल्दा तीन खेलमा नेपाल पराजित भएको थियो भने एक खेल बराबरी भएको थियो।

सिंगापुरसँगको खेलमा नेपालले अहिलेसम्म गोल फर्काउन सकेको छैन।एएफसी एशियन कप छनोटअन्तर्गत मलेसियासँग समूह चरणको पहिलो खेल खेल्नुअघि नेपालले तयारी स्वरुप सिंगापुरसँग मैत्रीपूर्ण खेल खेल्न लागेको हो।

सन् २०२७ मा साउदी अरेबियामा हुने एशियन कपको अन्तिम चरणको छनोट यही मार्च २५ देखि शुरू हुँदैछ।