खनियाबास गाउँपालिकाले ल्यायो ४४ करोड २६ लाखको बजेट

धादिङ । धादिङको खनियाबास गाउँपालिकाले आर्थिक वर्ष २०८३/०८४ का लागि ४४ करोड २६ लाख रुपैयाँको वार्षिक बजेट तथा कार्यक्रम पारित गरेको छ।

गाउँसभाको अवसरमा विभिन्न क्षेत्रमा उत्कृष्ट योगदान पुर्‍याउने व्यक्ति तथा संस्थाहरूलाई सम्मान गरिएको छ। गाउँपालिकाले असार ९ गते प्रस्तुत गरेको बजेट तथा कार्यक्रम असार १० गते सम्पन्न गाउँसभाबाट पारित गरेको हो।

संघ तथा प्रदेश सरकारबाट प्राप्त हुने समपूरक, विशेष तथा सशर्त अनुदान, वित्तीय हस्तान्तरण र राजस्व बाँडफाँडबाट प्राप्त हुने अनुमानित रकमलाई समेटेर आगामी आर्थिक वर्षका विकास योजना तथा कार्यक्रम सञ्चालन गर्ने गरी बजेट विनियोजन गरिएको गाउँपालिकाले जनाएको छ।

गाउँपालिकाले आगामी आर्थिक वर्षमा पूर्वाधार विकाससँगै शिक्षा, स्वास्थ्य, कृषि, पशुपालन तथा सामाजिक क्षेत्रलाई प्राथमिकतामा राखेर कार्यक्रम सञ्चालन गर्ने जनाएको छ।

बजेट प्रस्तुत कार्यक्रमको खुला सत्रमा प्रमुख अतिथिका रूपमा रमेश धमलाको उपस्थिति रहेको थियो। सो अवसरमा ९६ वर्षीय ज्येष्ठ नागरिक म्लङदुङ तामाङलाई सम्मान गरिएको थियो।

कार्यक्रममा शैक्षिक क्षेत्रमा उत्कृष्ट नतिजा हासिल गर्ने विद्यार्थीहरूलाई पनि सम्मान गरिएको छ। कक्षा ८ को परीक्षामा उत्कृष्ट अंक ल्याउने गणेशकुण्ड माध्यमिक विद्यालयका छात्र दोर्जे तामाङ र सिंगलादेवी माध्यमिक विद्यालय, झार्लाङ–१ की छात्रा अनु तामाङ सम्मानित भएका छन्।

त्यसैगरी, एसईई परीक्षामा उत्कृष्ट नतिजा हासिल गर्ने बच्छलादेवी माध्यमिक विद्यालयका छात्र दावा छिरीङ तामाङ र बृचेत माध्यमिक विद्यालयकी छात्रा मोनिका तामाङलाई पनि सम्मान गरिएको गाउँपालिकाले जनाएको छ।

गाउँपालिकाभित्र उत्कृष्ट कार्यसम्पादन गर्ने कर्मचारीहरूलाई समेत सम्मान गरिएको छ।

सम्मानित हुनेमा प्रशासन शाखा प्रमुख झलक लम्साल, खनियाबास ग्रामीण अस्पतालका एचए अनिश पाठक, पशु शाखा प्रमुख अमृत लामा तामाङ, कार्यालय सहयोगी सरिता तामाङ, दिलमाया तामाङ तथा वडा नं. १ का कार्यालय सहयोगी एल.बी. तामाङ रहेका छन्।

एसईई परीक्षामा गाउँपालिकाभर उत्कृष्ट ९२ प्रतिशत नतिजा ल्याउन सफल गणेशकुण्ड माध्यमिक विद्यालयलाई कदरपत्रसहित सम्मान गरिएको छ। साथै, गाउँपालिकाका विषयगत भवन तथा स्टिल फ्रेम भवन निर्माणका लागि जग्गा उपलब्ध गराउने जग्गादाताहरूलाई पनि सम्मान गरिएको थियो।